Давлат хавфсизлик хизмати икки нафар ички ишлар ходими катта миқдорда пора билан ушланганини маълум қилди.
Тошкент вилоятида яшовчи фуқаро вилоят ички ишлар ходимининг ўз хизмат ваколатини суиистеъмол қилган ҳолда коррупцион жиноятларни содир этиб келаётгани ҳақида ДХХ Call-марказига мурожаат қилган
Мурожаатга кўра, ИИБ ходими Жиноят кодексининг 210 (пора олиш), 131 (қўшмачилик), 135 (одам савдоси), 206 (ҳокимият ёки мансаб ваколати доирасидан четга чиқиш), 207 (мансабга совуққонлик билан қараш), 165-моддалари (товламачилик) билан жиноят иши қўзғатилиб, ҳозирда терговда бўлган собиқ ички ишлар ходимига суд идораларидаги танишлари орқали енгилроқ жазо тайинланишида ёрдам бериш эвазига унинг яқин қариндошларидан 20 минг доллар талаб қилган.
16 май куни ДХХ ва ИИВ тезкор бошқармалари ҳамкорлигида ўтказилган фаол тадбир давомида ИИБ ходими 1995 йилда туғилган фуқаро А.Б.дан 20 минг доллар олган вақтида жиноят устида қўлга олинди.
Яна бир ҳолатда 17 май куни ДХХ томонидан Бош прокуратура ҳузуридаги Иқтисодий жиноятларга қарши кураш департаменти ҳамда ИИВ тезкор бошқармаси билан ҳамкорликда ўтказилган фаол тадбирда Тошкент вилояти Янгийўл тумани ички ишлар ходими Жиноят кодексининг 103 (ўзини ўзи ўлдириш даражасига етказиш) ва 112-моддалари (ўлдириш ёки зўрлик ишлатиш билан қўрқитиш) билан айбланиб, 8 йил 5 ой муддатга озодликдан маҳрум қилинган маҳкумга жазо муддатини Тошкент шаҳар суди мансабдор шахслари орқали тафтиш инстанциясида камайтириб беришни ваъда қилиб, маҳкумнинг таниши Н.Н.дан 24 минг доллар пора олаётганида ушланган.
Тадбир жараёнида унинг ёнидан адвокатлик ва ҳакамлик суди судьяси гувоҳномалари ҳамда ИИВнинг лавозимга тайинлаш тўғрисидаги буйруғи нусхаси топилган.
Қайд этилишича, ушбу ходим 2014 йилга қадар ички ишлар идораларида ишлаб, 2022 йилдан эса адвокатлик фаолияти билан шуғулланиб келган. 2025 йилнинг апрелида унга яна бир бор имконият берилиб, ички ишлар идораларига қайтадан тикланган. Бироқ ишга тикланганига 2 ой бўлмаган бу ходим коррупцион ҳаракатларни такроран содир этган.
Ҳар икки ҳолат юзасидан тақдим этилган материаллар асосида Тошкент шаҳар прокуратураси томонидан Жиноят кодексининг 168-моддаси (фирибгарлик) 4-қисми ва 28, 211-моддаси (пора бериш) 3-қисми билан жиноят ишлари қўзғатилиб, тергов ҳаракатлари олиб борилмоқда.
11 май куни Тошкентда электр тармоқлар корхонасининг икки ходими 10 минг доллар пора олаётганда ушланганди. 13 майда Хонобод шаҳар суди раиси 30 минг долларни ноқонуний олаётганида ушлангани маълум қилинди. Март ойида Тошкент шаҳри ва вилоятида фуқароларни ишга киритиб қўйиш учун пул олган Миллий гвардия ходимлари қамоққа олинганди.
14 майдан Давлат хавфсизлик хизмати ваколатларига киритилган масалалар юзасидан жисмоний ва юридик шахсларнинг мурожаатларини тезкор равишда қабул қилиш мақсадида Call-марказ фаолият юрита бошлади. Call-марказга 1520 қисқа рақами орқали қўнғироқ қилиш мумкин. Мурожаат қилган фуқароларнинг шахси сир сақланиши кафолатланади.
Изоҳ (0)