Самарқанд вилоятининг Жомбой туманида 22 минг долларга ер сотишни мақсад қилиб, 11 минг долларини олган ота-ўғил қўлга тушди. Бу ҳақда «Дарё»га ДХХ Самарқанд вилоят бошқармаси маълум қилди.
ДХХнинг Самарқанд вилояти бошқармаси ҳамда вилоят департаменти ходимлари ҳамкорлигида ўтказилган тадбирда Жомбой туманида яшовчи 56 ёшли Н.Қ. ва унинг ўғли 26 ёшли З.П. ўзбошимчалик билан эгаллаб олган давлат тасарруфидаги 0,80 гектар ер майдонини фирибгарлик йўли билан сотишга уринган. Ота-бола харидорга ерни Кадастр агентлиги туман бўлимидаги танишлари орқали расмийлаштириб беришини айтиб, сўралган 22 минг долларнинг 11 минг долларини олганда жиноят устида қўлга олинган.
Ҳозирда ота-болага Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Изоҳ (0)