Фарғона вилоятининг Қўштепа туманида 12 июнь куни диний таълимотдан сабоқ бериш тартибини бузиш билан боғлиқ ҳолат аниқланди.
“Сармозор” МФЙ Олчинор кўчасидаги қурилиши тугалланмаган уй ертўласига тезкор тадбир иштирокчилари кириб борган. Ушбу ҳужра 1989 йилда туғилган шахс томонидан ўзбошимчалик билан ташкил этилган.
Диний сабоқ бериш ваколати йўқ ҳужра эгаси шу йилнинг 3 июнидан ҳозирга қадар ота-онаси томонидан бу ертўлага ташлаб кетилган 10 нафар вояга етмаган болалар учун ойига 500 минг сўмдан олиши керак бўлган.
Ҳужра ташкил этган шахс ва болаларнинг ота-оналарига нисбатан МЖтКнинг тегишли моддалари билан ҳужжатлар расмийлаштирилиб, ҳужжатлар судларга юборилди.
Ўзбекистонда фарзандини ноқонуний диний таълим олишга жалб этганлик учун маъмурий жавобгарлик белгиланди.
Қонун расмий эълон қилинган кундан эътиборан кучга кирди. Ушбу қонун лойиҳаси 2024 йил 25 июнь куни депутатлар томонидан биринчи ўқишда қабул қилинганди. Олий Мажлис Сенатининг 16 августдаги ялпи мажлисида қонун маъқулланди.
Қонунчилик палатаси спикери ўринбосари Одилжон Тожиев буни айримлар қонунни нотўғри талқин қилаётгани сабаб бола ҳуқуқлари кафолатларини кучайтиришга оид қонун бўйича изоҳ берганди.
“Таълим тўғрисида”ги қонунга кўра, боланинг умумий ўрта, ўрта махсус таълим олишини таъминлаш, унинг интеллектуал, маънавий ва жисмоний ривожланишига шароит яратиш ота-оналар мажбурияти ҳисобланади. Бироқ Одилжон Тожиев ҳозирги кунда болаларнинг ноқонуний диний сабоқ олишига, давлатнинг мажбурий таълим тизими таъсиридан четда қолишига ҳамда уларда бирёқлама дунёқараш ва мутаассиблик кайфияти шаклланишига ота-оналарнинг ўзи сабабчи бўлиб қолаётганини айтганди.
Хусусан, ноқонуний диний таълим бериш асосан ота-оналар ташаббуси билан “ҳужра” шароитида ташкил этилмоқда. Охирги 5 йилда “ҳужра”да диний таълим олган 9 705 нафар бола аниқланган. Аксарият ҳолларда ота-оналар ўз болаларини диний таълим бериш ҳуқуқи бўлмаган ташкилот ёки шахс ихтиёрига бир неча ойга қаровсиз ташлаб кетиши кузатилмоқда. Бу орада бола тўлақонли шахс сифатида ривожланиши учун зарур бўлган муҳитдан узилиб қолмоқда.
Юқоридаги хатти-ҳаракат юридик тилда “болани қонунга хилоф равишда диний таълим олиш жараёнига жалб қилиш”деб баён қилинган. Қисқа қилиб айтганда, ота-она боласини ъҳужраъга топширса, жавобгар бўлади. “Ҳужра”лар фаолияти эса кўп йиллардан бери қонун билан қатъий тақиқланган, деган эди Одилжон Тожиев.
Шунингдек, бу нарса ота-онанинг ўз фарзандига диний сабоқ, таълим-тарбия беришига умуман алоқаси йўқлигини, чунки бу ҳар қандай ота-онанинг ўз фарзандини шахсан ўзи тарбия қилиш бўйича дахлсиз ҳуқуқи ҳисобланишини қайд этиб ўтганди.
Изоҳ (0)