Фарғона, Наманган вилоятлари ва Тошкент шаҳрида ҳаж ва умра зиёратларини ноқонуний ташкил этишга уринган шахслар ҳаракатларига чек қўйилди.
Давлат хавфсизлик хизматининг Тошкент шаҳри бўйича бошқармаси ходимлари томонидан ички ишлар органлари билан ҳамкорликда ўтказилган тезкор тадбирда, Тошкент шаҳрида фаолият юритувчи туристик фирмалардан бирининг 4 нафар ходими 3 нафар фуқарони ишчи визаси орқали ҳаж зиёратига юбориш эвазига 7 минг доллардан ҳамда 1 нафар фуқарони сайёҳлик визаси орқали юбориш эвазига 5 минг доллар, жами 26 минг доллар талаб қилиб, олдиндан 20 минг доллар олган вақтида ушланган.
Хизматнинг Фарғона вилояти бўйича бошқармаси ҳамда ички ишлар органлари ходимлари ҳамкорлигида ўтказилган тезкор тадбирда эса Марғилон шаҳрида фаолият юритувчи туристик фирманинг иш юритувчиси 2 нафар фуқарони умра сафарига юбориш эвазига 2400 доллар, шунингдек, 3 нафар фуқарони ҳаж зиёратига юбориш эвазига 15 минг доллар олган вақтида ашёвий далиллар билан ушланган.
Хизматнинг Наманган вилояти бўйича бошқармаси ходимлари томонидан ички ишлар органлари билан ҳамкорликда ўтказилган тезкор тадбирда, Наманган шаҳрида яшовчи, 1999 йилда туғилган шахс 2025 йилда ҳаж сафарига юбориш бўйича ижтимоий тармоқларга сохта эълонлар жойлаб, 3 нафар фуқаронинг ишончига кирган. Уларнинг ҳар биридан 4900 доллар, жами 14 700 доллар олган вақтида ушланган.
Чуст туманида фаолият юритувчи туристик фирма раҳбари эса умра зиёратини ташкил этиш учун тегишли лицензияга эга бўлмай туриб, 3 нафар фуқарони 1350 доллардан, жами 4050 долларга умра зиёратига юборишини айтиб, шундан 4 минг долларни олган вақтида ашёвий далиллар билан ушланган.
Иқтисодий жиноятларга қарши курашиш департаменти ҳамкорлигида ўтказилган тезкор тадбирда эса Тошкент шаҳрида яшовчи, 1998 йилда туғилган шахс пойтахтда фаолият юритувчи масъулияти чекланган жамият орқали 5 нафар фуқарони жами 27 минг доллар эвазига ҳаж визаси асосида диний амалларни бажариш учун Саудия Арабистонига юборишни ваъда қилиб, олдиндан 13 500 доллар олган вақтида ушланди.
Ҳозирда мазкур ҳолатлар юзасидан барча қонунбузарларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Ҳаж ва умра тадбирларини ташкил этиш
Ҳаж зиёратига бориш учун рухсатнома олиш талаб этилади. Ҳар йили ажратилган квоталар асосида номзодлар тасдиқланади. Тасдиқланган номзодлар сафар ҳужжатларини расмийлаштиради.
2024 йил июлида Ўзбекистонда умра тадбирларини ташкил этиш ва ўтказиш лицензияланадиган фаолиятнинг алоҳида тури сифатида белгиланган. Лицензияга эга бўлмаган тадбиркорлик субъектлари томонидан умра хизматларини кўрсатиш тақиқланган. Бундай ҳуқуқбузарликлар учун юридик шахсларга солинадиган жарималар миқдорлари БҲМнинг 200 баравари (75 миллион сўм) этиб белгиланган.
Изоҳ (0)