Японияда ҳалок бўлган аёлнинг жасади 1 август куни Ўзбекистонга қайтарилди. Бу ҳақда “Дунё” хабар берди.
Унга кўра, Вазирлар Маҳкамасининг 252-қарорига мувофиқ мамлакатнинг Япониядаги элчихонаси ва Миграция агентлиги томонидан жасадни ватанга қайтариш билан боғлиқ харажатларни қоплаш, марҳуманинг 2 нафар вояга етмаган фарзанди ҳамда турмуш ўртоғига авиачипталар харид қилишда амалий ёрдам кўрсатилди.
Элчихона консуллик ходими томонидан вафот этган фуқаронинг жасадини рейсга топширишдаги ташкилий ишларда кўмак кўрсатилиб, ушбу рейс билан Ўзбекистонга қайтаётган оила аъзоларини аэропортда кузатиб қўйилди.
Ўзбекистонда жорий йил 30 июлдан 30 августгача “Ватанга қайтариш” хайрия гуманитар акцияси амалга оширилади. Акциядан кўзланган мақсад чет давлатларда оғир шароитда қолган Ўзбекистон фуқароларини ватанга қайтариш ва уларни самарали реинтеграция қилишдан иборат.
Ўзбекистонга қайтарилаётган фуқаролар
2025 йилнинг бошларида Россиянинг Тива Республикаси Оқ Довурак шаҳрида вақтинча ишлаётган тўрт нафар Ўзбекистон фуқароси ватанга қайтарилди. Фуқароларнинг яшаш жойида содир бўлган кучли ёнғин натижасида уларнинг ҳужжатлари, шу жумладан, паспортлари йўқолган.
27 февраль куни Маккада оғир касалликка чалинган ўзбекистонлик ватанга қайтарилди. Февраль ойи охирида Россияда икки боласи билан қийин вазиятда қолган аёл Ўзбекистонга қайтарилди.
2025 йил 5 март куни Россиянинг Владивосток шаҳрида оғир тан жароҳати олган Ўзбекистон фуқароси ватанга қайтарилди. Март ойининг ўрталарида Новосибирскдаги Бош консулхонаси кўмагида Россиянинг Саха республикаси Нерюнгри шаҳрида қийин ҳаётий вазиятга тушиб қолган она ва унинг тўрт нафар фарзанди Ўзбекистонга қайтарилди. 17 март куни ота-она қарамоғисиз қолган 10 нафар вояга етмаган бола Қозоғистондан Ўзбекистонга қайтарилди. Шунингдек, Россияда ота-она қарамоғисиз қолган 30 нафар бола Ўзбекистонга қайтарилди.
14 июнь куни Туркияда ўгай отаси жинсий тажовуз қилган ўзбекистонлик қиз ватанга қайтарилди. 20 июнда эса Уммонда тутқунликда сақланган аёл болалари билан Ўзбекистонга қайтарилди.
21 июнда Эрондаги 60 га яқин Ўзбекистон фуқаролари Туркманистон орқали ватанга қайтарилган.
Изоҳ (0)