АҚШ ва НАТО Украинага қурол етказиб беришнинг янги механизмини яратмоқда

НАТО ва АҚШ Европа давлатлари ҳисобидан Украинага қурол-яроғ етказиб беришнинг янги механизмини ишлаб чиқмоқда, деб хабар бермоқда Reuters агентлиги.

Режага кўра, Киев ҳарбий кучлар (VSU) энг кўп эҳтиёж сезаётган қуроллар рўйхатини тузади. Бу рўйхат “Украина учун устувор талаблар рўйхати” (Priority Ukraine Requirements List — PURL) деб аталади.

НАТО давлатлари эса ушбу қуролларни ўз захираларидан ёки АҚШдан сотиб олиб, Украинага етказиб беради. Ушбу етказиб беришлар учун тўловни НАТО таркибига кирувчи Европа давлатлари амалга оширади. Жараённи НАТО бош котиби Марк Рютте мувофиқлаштиради.

Қурол-яроғ етказиб бериш ҳар бири тахминан 500 миллион доллар (430 миллион евро) қийматидаги пакетлар кўринишида амалга оширилиши кўзда тутилган.

Европалик амалдорнинг Reuters’га айтишича, НАТО иттифоқчилари бу йўл билан Украинага жами 10 миллиард долларлик (тахминан 8,6 миллиард евро) қурол етказиб беришни режалаштирмоқда. Бу режа қанча муддат ичида амалга оширилиши ҳақида эса агентлик суҳбатдоши аниқ маълумот бермаган.