Дин ишлари бўйича қўмита яна бир қатор тадбиркорлик субъектлари фуқароларга умра тадбирини ноқонуний ташкил этиб келганини маълум қилди.
Қўмита томонидан ўтказилган текширувларда Фарғона вилояти Марғилон шаҳрида жойлашган Xurmo travel umra МЧЖ (Saxiy travel) фуқароларга лицензиясиз умра тадбирини ташкил этиб келгани аниқланган.
Шунингдек, Сурхондарё вилояти, Денов шаҳрида Anot tour номи остида, Тошкент шаҳри, Чилонзор туманида Sokin travel номи остида жисмоний шахслар томонидан давлат рўйхатидан ўтмасдан умра тадбирини ташкил этиб келингани аниқланган.
Юқоридаги ҳолатлар юзасидан қўмита томонидан Xurmo travel umra МЧЖ (Saxiy travel)га нисбатан “Лицензиялаш, рухсат бериш ва хабардор қилиш тартиб-таомиллари тўғрисида”ги қонуннинг тегишли моддалари талаблари бузилиши юзасидан иш қўзғатилиб, ишни кўриб чиқиш якунлари юзасидан БҲМнинг 200 баравари — 75 миллион сўм жарима қўллаш бўйича қарор қабул қилинди.
Аnor tour ва Sokin travel номлари остида ишлаб келган жисмоний шахсларнинг хатти-ҳаракатлари бўйича тўпланган материаллар тегишли чора кўриш юзасидан ҳуқуқ-тартибот органларига юборилди.
Дин ишлари бўйича қўмита умра тадбирларини ташкил этиш ва ўтказишга оид хизматларини лицензияга эга бўлмаган тадбиркорлик субъектлари томонидан кўрсатиш тақиқланганини эслатди ва кейинчалик турли кўнгилсиз ҳолатларга тушиб қолмаслик учун ишончли ва кафолатланган хизматлардан фойдаланишни тавсия этди.
Ўзбекистонда умра тадбирларини ташкил этиш
2024 йил июлида Ўзбекистонда умра тадбирларини ташкил этиш ва ўтказиш лицензияланадиган фаолиятнинг алоҳида тури сифатида белгиланди.
Ҳукумат қарори билан қуйидаги лицензия талаб ва шартлари жорий этилган:
- 1 млн доллар миқдордаги маблағни “Зиёрат” жамғармасига захира қилиб қўйиш;
- Зиёратчиларга гуруҳ раҳбари этиб Ўзбекистон мусулмонлари идораси билан тузиладиган шартнома асосида диний билим ва кўникмаларга эга бўлган мутахассисни тайинлаш;
- штатида диний таълим йўналишлари бўйича таълим муассасаси ёки Ўзбекистон халқаро ислом академиясининг битирувчиси бўлган камида бир нафар мутахассиснинг мавжудлиги;
- вояга етмаган фуқароларга хизмат кўрсатмаслик;
- ўз фаолиятини туроператор ва турагентлар орқали амалга оширмаслик;
- зиёратчилар учун Саудия Арабистони Подшоҳлигининг фақат Умра визасини расмийлаштириш.
Бунда, Дин ишлари бўйича қўмита мазкур соҳадаги лицензияловчи ваколатли орган сифатида белгиланди. Қўмита 21 ноябрь куни умра тадбирларини ташкил этиш ва ўтказиш фаолияти учун лицензияга эга бўлган тадбиркорлик субъектлари рўйхати эълон қилинди. Унда 12 та тур фирма ўрин олган.
Лицензияга эга бўлмаган тадбиркорлик субъектлари томонидан умра хизматлариникўрсатиш тақиқланган. Бундай ҳуқуқбузарликлар учун юридик шахсларга солинадиган жарималар миқдорлари БҲМнинг 200 баравари (75 миллион сўм) этиб белгиланган.
Изоҳ (0)