Япониянинг Окинава оролидаги АҚШнинг “Кадена” ҳарбий-ҳаво кучлари базасида портлаш содир бўлди. Бу ҳақда NHK телеканали маълум қилмоқда.
Ҳодиса Америка базаси ҳудудида Япония мудофаа кучлари бошқараётган объектда юз берган. Тахминларга кўра, ҳодиса портламай қолган снарядларни вақтинча сақлаш жойида содир бўлган. Портлаш оқибатида камида тўрт киши жароҳат олган.
Таъкидланишича, ушбу ҳодиса ёнғин тарқалиши хавфини келтириб чиқармайди. Дастлабки маълумотларга кўра, Япония мудофаа кучлари ходимлари портламай қолган ўқ-дориларни йўқ қилишга тайёргарлик кўраётганда портлаш юз берган.
Аниқланишича, жабрланувчиларнинг қўллари кесилган ва қулоқлари оғир шикастланган.
Мудофаа вазирлиги маълумотларига кўра, бу 1974 йилда Қуруқликдаги ўзини ўзи мудофаа кучларида портламаган ўқ-дориларни зарарсизлантиришга ихтисослашган бўлинма ташкил этилганидан буён ишлар давомида портламаган ўқ-дорининг портлаши билан боғлиқ биринчи ҳодиса ҳисобланади. Шунингдек, бу портлаш жароҳатланишларга олиб келган илк ҳолат ҳам бўлди.
“Мен ёнимдан ўтиб кетаётган полиция машинасини, таниш белгилари бўлмаган полиция машинасини ва тез ёрдам машинасини кўрдим-да, дастлаб буни йўл-транспорт ҳодисаси деб ўйладим. Бу портламаган бомба эканлигини англамадим, шунинг учун ҳозир ҳайратдаман. Мен бу ерда 69 йилдан бери яшаб келаман, аммо портламаган бомба портлаши ҳақида биринчи марта эшитишим. Жароҳатлар жиддий бўлмаганидан хурсандман”, дейди портлаш жойидан тахминан 1,5 километр жануби-шарқда ишлаётган аёл.
Изоҳ (0)