АҚШ Мудофаа вазирлиги Япония шимолидаги Мисава авиабазасига илк бор F-35 “кўринмас қирувчи” самолётларини жойлаштиради. Бу ҳақда NHK хабар берди.
Маълум қилинишича, бу Японияда жойлашган тактик самолётларни модернизация қилиш режаси доирасида амалга оширилмоқда. Пентагон Аомори префектурасидаги авиабазада жойлашган 36 та F-16 самолётини 48 та F-35 қирувчи самолётига алмаштиришини маълум қилди.
F-35 бешинчи авлод қирувчи самолёти бўлиб, илғор радарлардан қочиш ва душман таҳдидларини тезкор аниқлаш тизимлари билан жиҳозланган.
Келгуси бир неча йил ичида амалга ошириладиган модернизация режаси 10 миллиард доллардан ортиқ сармоя киритишни назарда тутади.
Режа АҚШ-Япония альянсини мустаҳкамлайди, минтақавий жиловни кучайтиради, Ҳинд-Тинч океанида тинчлик ва барқарорликка ёрдам беради, — дейилади хабарда.
Япония Вазирлар Маҳкамаси бош котиби Хаяси Ёсимасанинг айтишича, модернизация режаси Япония Иккинчи жаҳон уруши тугаганидан бери энг жиддий ва мураккаб хавфсизлик вазиятига дуч келган ва қўшни давлатлар ҳарбий фаолиятларини кучайтираётган бир пайтда амалга оширилмоқда.
У мазкур режа қирувчи самолётларнинг ишлашини яхшилаши, АҚШ кучларининг жанговар имкониятларини, жавоб қайтариш потенциалини янада кучайтиришини таъкидлаган.
Мисава авиабазаси Сугару бўғози яқинида жойлашган бўлиб, у орқали Хитой ва Россия ҳарбий кемалари тез-тез Тинч океанига чиқади. Бундан ташқари, Россиянинг Тинч океанидаги асосий порти — Владивосток авиабазадан унчалик узоқ эмас.
Изоҳ (0)