АҚШ федерал суди Калифорния штатидан собиқ полициячиси Алан Ҳостеттерни 2021 йил 6 январь куни Вашингтондаги Капитолий биносига бостириб киргани учун 11 йилу 3 ойга озодликдан маҳрум қилиш бўйича ҳукм ўқиди. Қораловчи томон 59 ёшли Ҳостеттер учун 12 ярим йил қамоқ жазосини талаб қилганди. Собиқ полициячи январь ойида жазони ўташни бошлайди.
Июль ойида судья уни тўртта моддада, жумладан Конгресс ишига тўсқинлик қилиш учун тил бириктириш ва хавфли қурол билан тартибсизлик қилишда айбдор деб топганди. Судда сўнгги дақиқаларгача Ҳостеттер ўша пайтдаги президент Дональд Трампнинг 2020 йилги сайловлардаги ғалабаси катта фирибгарлик йўли билан ўғирланганини даъво қилган.
2021 йил январь ойида Капитолийга ҳужум
Президентлик сайловларида мағлуб бўлган Дональд Трамп тарафдорлари 2021 йил 6 январь куни овоз бериш натижаларини тасдиқлаш вақтида Конгресс биноси олдида ғалаён кўтарди. Намойишчилар бинога бостириб кирди, Конгрессдаги муҳокамалар бир неча соатга тўхтатилди ва қонун чиқарувчилар эвакуация қилинди. Полиция ҳужум иштирокчиларига қарши кўздан ёш оқизувчи газ ишлатган, АҚШ Миллий гвардияси Вашингтонга етиб келган.
Норозилик пайтида беш киши ҳалок бўлди, 50 га яқин киши қўлга олинди, уларнинг баъзиларига айблов эълон қилинди. Ҳужумнинг юзлаб иштирокчилари аллақачон турли муддатларга қамоқ жазосига ҳукм қилинди. Терговчилар фикрича, намойишнинг асосий иштирокчилари Proud Boys ва Oath Keepers ташкилотлари бўлган.
Капитолийга бостириб кириш ишида жами 1 230 дан ортиқ киши иштирок этмоқда, улар орасида Дональд Трамп ҳам бор. АҚШ собиқ президенти 2020 йилги сайлов натижаларини бекор қилишга уринишда айбланмоқда. У ўзининг айбсизлигини билдиряпти. 2023 йил декабрь ойи бошида суд собиқ президент дахлсизлик ҳуқуқига эга эмаслиги ва Капитолийга бостириб киришдаги роли учун фуқаролик даъволари суди олдида жавоб бериши кераклиги ҳақида қарор чиқарди.
Изоҳ (0)