Хоразм ва Андижон вилоятларида имтиёзли кредит олиб беришни ваъда қилган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Ҳазорасп туманида фуқаро Т.Ж. фуқаро О.Б.нинг ишончига кириб, унга гўёки Хоразм вилояти тижорат банкларида ишловчи танишлари орқали 1,5 млрд сўм имтиёзли кредит ажратилишида ёрдам беришини айтган.
Бунинг эвазига 150 млн сўм пулни олган вақтида ушланган.
Шунингдек, Андижон вилоятида фуқаро У.О. фуқаро Б.М.га гўёки шаҳар банк хизматлари марказида ишловчи танишлари орқали 3 минг доллар эвазига 100 минг доллар миқдорида кредит ажратиб беришини айтган.
У сўралган пулдан 1 минг долларни олган вақтида ушланган.
Мазкур ҳолатлар юзасидан Жиноят кодексининг 168-моддаси (фирибгарлик) 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Ўзбекистоннинг қатор ҳудудларида кредит пулларини ўзлаштирганлар ушлангани, Қашқадарёда кредит маблағларини ўзлаштирган банк бошқарувчиси собиқ ўринбосари аниқлангани, Фарғонада 19 нафар фуқаро номига автокредит расмийлаштириб, ажратилган маблағни ўзлаштирган шахслар аниқлангани тўғрисида хабар берилганди.
Изоҳ (0)