Тошкент шаҳрининг Чилонзор тумани электр тармоқлар корхонаси 2 нафар ходими 10 минг доллар пора олган вақтда ушланди. Бу ҳақда пойтахт ИИББ матбуот хизмати хабар берди.
Маълум қилинишича, ходимлар электромобилларни қувватлаш ускунасини ўрнатиш учун рухсатнома олиб бериш эвазига 15 минг доллар талаб қилган. Ўтказилган тезкор тадбирда ушбу ходимлар фуқародан сўралган пулнинг 10 минг долларини олаётганда қўлга олинди.
“Оилалиман, уч нафар фарзандим бор. Олдимга бир йигит келиб, электромобиллар учун трансформатор пункти ўрнатишга ёрдам сўради. Ёрдам бериш мақсадида йўл-йўриғини тушунтирдим. 10 минг доллар олиб келди. Ўша вақтда ушландим. Пушаймонман қилган ишимдан”, дейди гумонланувчи.
Гумонланувчилардан бири туман электр тармоқлар корхонасида бош муҳандис, яна бири электр устаси бўлиб ишлаган.
“Трансформатор пунктини олиб келиб, ўрнатиб беришни сўради. Бу нарса қўлимиздан келиши ё келмаслигини сўради. Биз унга ҳа деб, 15 минг долларга келишдик. Трансформаторни бозордан олиб келиш нархи 6 минг доллар бўлади дедик. Унинг лойиҳа ишлари 9 минг долларга боради деб айтгандик”, дейди яна бир гумонланувчи шахс.
Тўпланган ҳужжатлар қонуний қарор қабул қилиш учун прокуратура органларига юборилди.
Сўнгги ойларда эълон қилинган фирибгарлик ва коррупция ҳолатлари
Март ойида Тошкент шаҳри ва вилоятида фуқароларни ишга киритиб қўйиш учун пул олган Миллий гвардия ходимлари қамоққа олинди. Февралда Тошкент шаҳрининг Яшнобод, Навоий шаҳри ҳамда Фарғона вилоятининг Олтиариқ туманларида фуқароларга имтиёзли кредит олиб беришни ваъда қилган шахслар ушланди. Хоразмда транспорт бошқармаси бош мутахассиси 80 минг доллар олаётганида қўлга тушди. Январда Тошкентнинг Учтепа туманида ҳоким ёрдамчиси 30 минг доллари олаётганига ушланди.
Изоҳ (0)