Бугун Президент одатий форматлардан воз кечиб, илк маротаба халқ вакиллари бўлган сенатор ва депутатлар билан коррупцияни олдини ва унга қарши курашиш масаласи бўйича учрашув ўтказди.
Халқаро ташкилотларнинг маълумотларига кўра, коррупциянинг глобал жамият учун зиёни йилига 3 триллион АҚШ долларини ташкил қилади. Таҳлилларга кўра, ҳар йили дунё бўйлаб тахминан 1 триллион АҚШ доллари миқдорида пора берилади. Коррупциянинг ЯИМдаги улуши 5 фоиздан зиёдни ташкил қилади.
Юқорида қайд этилган рақамлар коррупциянинг барқарор ривожланиш учун таҳдид солувчи энг катта глобал хавф эканлигини намоён қилмоқда.
Коррупцияга қарши курашиш бўйича миллий кенгашнинг навбатдаги йиғилишида шахсан давлат раҳбарининг иштирок этиши бу масалада қатъий сиёсий позиция ва ироданинг мавжудлигини кўрсатади.
Учрашувда жамиятда энг кўп ва қизғин муҳокама қилинадиган масалалардан бири бўлган коррупцияни олдини олиш ва унга қарши курашиш борасида амалга оширилган ишлар, комплекс чора-тадбирларга баҳо берилиб, мавжуд вазият таҳлили очиқланди ва коррупциядан ҳоли муҳит яратиш бўйича келгусидаги стратегик вазифалар, уларни амалга ошириш механизмлари кун тартибига кўндаланг қўйилди.
Йиғилишда таъкидланганидек, бундан буён, секторлар фаолияти билан прокурор, ички ишлар ва солиқ шуғулланмаслигининг эълон қилиниши ўз вақтида қабул қилинган қарор бўлди, десак асло муболаға қилмаган бўламиз.
Ўз ўрнида эътироф этиш лозим, бундан саккиз йил аввал ҳудудларни секторларга бўлиб ишни ташкил этиш тизимининг жорий этилганлиги халқ билан аниқ, манзилли мулоқотнинг йўлга қўйилишини таъминлади. Шу билан бирга йиллар мобайнида “тромб” сингари тўпланиб қолган ижтимоий муамоларни юргизиб юбориши учун хизмат қилди.
Ўткан давр мобайнида прокурор, ички ишлар ва солиқчи тадбиркор ва аҳолига ҳақиқий елкадош эканлигини исботлаб, халққа яқинлашди. Кечагидек эсимизда, тадбиркор ёки аҳоли ушбу соҳа вакилларини кўрса қандайдир ички қўрқув, сесканиш бўларди.
Прокурор, ички ишлар ходими, солиқчи хонадонма хонадон, маҳаллама маҳалла, бирма бир юриб, халқнинг ичига кириб аҳолимиз, тадбиркорларни қийнаб турган ҳаётий муаммо ва эҳтиёжларини ўрганди ва унга қонуний ечим топишда ҳақиқий маслакдош, кўмакчи бўлди.
Агар ўз вақтида шундай механизм ташкил қилинмаганда эди, ҳозир ўз мевасини бераётган ислоҳотларнинг натижасини кўрмаган бўлар эдик.
Тан олиб айтиш керак, ҳали ҳам бажарилиши керак бўлган вазифалар мавжуд. Давлат раҳбари ўз нутқда бунинг ечимини ҳам аниқ кўрсатиб бериб, уларнинг ўрнига эндиликда Бош вазир ўринбосарлари ўзига тегишли соҳалар билан ўз кучи ва тизими билан шуғулланиши белгиланди.
Давлат раҳбари прокуратура, ички ишлар, солиқ органлари раҳбарларининг сектор ишидан озод қилиниши, бу – эски даврга қайтиб, аҳоли ва тадбиркорларга ҳар қадамда тўсиқ, коррупцияга шароит яратиш, дегани эмас, дея қатъий талаб қўйди.
Президент Шавкат Мирзиёев коррупцияга қарши курашишда ташаббускор ва реформатор эканлигини яна бир бор намоён қилди.
Йиғилиш ҳали ҳам онгида эскича дунёқараш қолдиқлари сақланиб қолганлар учун ҳақиқий огоҳлантириш “сигнали” бўлди.
Ушбу учрашувдан хулоса қилиб айтиш мумкинки, давлатимиз раҳбари томонидан қўйилган вазифалар коррупцияга қарши курашиш бўйича амалга оширилаётган ислоҳотларга янги “импулс” бериб бу борадаги ишлар самардорлигини жадаллаштириш учун хизмат қилади.
Анваржон Миркомилов,
“Тараққиёт стратегияси” маркази бўлим бошлиғи
Изоҳ (0)