Сурхондарёда жиноят иши бўйича берилган тафтиш шикоятини қаноатлантириб бериш эвазига судьяга 1000 доллар пора таклиф қилган адвокат ушланди. Бу ҳақда Судьялар олий кенгаши матбуот хизмати хабар берди.
Маълум қилинишича, адвокат судьядан Сурхондарё вилоят суди иш юритувидаги Ш.Ҳ.га (биринчи инстанция суди томонидан Жиноят кодексининг 168-моддаси 4-қисми “а” банди билан айбли деб топилган, ҳукм апелляция инстанциясида ўзгаришсиз қолдирилган) доир жиноят иши бўйича берилган тафтиш шикоятини қаноатлантириб беришни сўраган.
Адвокат иш бўйича фуқаровий даъвогарнинг вакили бўлиб, тафтиш шикояти қонуний кўриб чиқилиши тушунтирилишига қарамай, такрор пора таклиф қилган. Судьянинг билдиргиси асосида ўтказилган тадбирда адвокат далилий ашё билан қўлга олинган.
“Моддий манфаатдорлик таклиф қилган ҳолда ишни ўз фойдасига ҳал этишга уриниш нафақат коррупция, шунингдек, суд ишларига аралашишнинг кўринишларидан бири бўлиб, ҳуқуқий таъсир чораси қўлланишига олиб келиши эслатилади”, дея қўшимча қилинади хабарда.
Тошкентнинг Учтепа туманида ҳоким ёрдамчиси 30 минг доллари олаётганига қўлга тушгани ҳақида хабар берилган эди. Олмазор тумани прокуратураси терговчиси 20 минг АҚШ доллари миқдорида пора олган вақтда ушланганди.
Шунингдек, Тошкентда фирибгарликда айбланиб адвокат ва юрист ушланган эди.
Ўзбекистонда 2024 йилда жами 6898 нафар шахс томонидан 5716 та коррупцияга оид жиноят содир этилган. Жамоатчилик муҳокамасига қўйилган 2025 йилга мўлжалланган давлат дастури лойиҳасида раҳбарлик лавозимидаги 500 кишининг коррупцияга мойиллигини баҳолаш режалаштирилган.
Изоҳ (0)