Монако маликаси Шарлен давлат бюджетини исроф қилишда айбланмоқда. Княз Албер II нинг собиқ хазиначиси Клод Палмеро қироллик оиласининг барча молиявий ишлари ҳақида батафсил маълумот берувчи ёзувларини ошкор қилди. Бу ёзувлар билан The Wall Street Journal журналистлари танишиш имкониятига эга бўлишди.
Нашрнинг хабар беришича, Шарлен сўнгги 8 йил ичида давлат хазинасидан тахминан 17 миллион доллар сарфлаган. Расмий маълумотларга кўра эса Монаконинг харажатлар рўйхатида унинг таъминоти тахминан 8,5 миллион долларга тушиши керак эди.
Хабарларга кўра, маблағлар монархнинг турли конгилхушликларига сарфланган. Масалан, у ўз идорасини таъмирлаш учун 1 миллион ажратган, 2016 йилда бир кунда номаълум эҳтиёжлар учун 66 минг доллар сарфлаган, 2017 йилда эса Албер ҳатто ортиқча сарфланган 800 минг еврони қоплашга мажбур бўлган.
Фош этувчи ҳужжатларда қироллик оиласи ўзларига 795 минг доллар ўтказгани ҳақида маълумотлар мавжуд бўлиб, бу харажатлар учун ҳеч қандай мақсад кўрсатилмаган. Бу махфийлик билан боғлиқлиги айтилган. Кўпчилик бу маблағ Шарленнинг ўзи учун ёки Албертнинг ўзи яшайдиган шахсий квартираси учун ишлатилган бўлиши мумкин деб тахмин қилмоқда. Тахминларга кўра, эр-хотин узоқ вақтдан бери жиддий муаммоларга дуч келган, шу сабабли улар бирга яшамайди.
Ўтган йили Палмеронинг тўплаган архивлари Ле Монде нашрини қизиқтириб қолди. Улар хазинабоннинг ёзувларини ўрганиб чиқиб, маликанинг таъмирлашдан ташқари, бошқа молиявий ортиқча харажатларга ҳам йўл қўйганини маълум қилди. Масалан, у Алберт билан расмий никоҳдан олдин ҳам келажакдаги турмуш ўртоғини йилига 1,5 миллион доллар нафақа тайинлашга, шунингдек, 700 минг долларлик бир марталик пул ўтказмасини амалга оширишга мажбур қилган.
Нашр маълумотларига кўра, малика ўзи билан 8 киши ишлаётганига қарамай, ходимлар сонини кўпайтиришни талаб қилган. Бу қанчага тушгани ҳақида фақат тахмин қилиш мумкин. Бироқ маълум бўлишича, Шарлен фақат шахсий ошпазига кунига 300 евродан маош тўлаган.
Шунингдек, собиқ хазиначи маликанинг акаси Шон учун 300 минг евролик учта тўловни имзолашга мажбур бўлганини айтди. Ёзувларда кўрсатилишича, бу маблағлар унинг уй-жойини таъмирлашга сарфланиши керак эди.
Эслатиб ўтамиз, бу тафсилотларнинг барчаси Монакодаги коррупцияга бағишланган аноним веб-сайтда эълон қилинган бир қатор фош этишлардан сўнг жамоатчиликка маълум бўлди. Жанжал шу қадар катта тус олдики, княз Алберт бутун ходимлар аппаратини тарқатиб юборди. У, жумладан, йигирма йилдан ортиқ хазиначи лавозимида ишлаган Клод Палмерони ҳам ишдан бўшатди. Палмеро ҳозирги монархнинг отаси Рене III давридан бошлаб ишлаган ва узоқ йиллар давомида сарой сирларини сақлаб келган. Истеъфога чиққандан сўнг Палмеро архивларни ўзи билан олиб кетди ва энди Монако қироллик оиласига қарши кўрсатмаларда ўз дафтарларидаги маълумотларни ошкор қилмоқда.
Изоҳ (0)