Клублар ўртасидаги Жаҳон чемпионати бошланди. C гуруҳи 1-тури доирасида бўлиб ўтган “Бавария” ҳамда “Окленд Сити” жамоалари ўртасидаги баҳсда мюнхенликлар рақиб дарвозасига 10 та гол уриб, дастлабки 3 очкони қўлга киритди.
Учрашув ҳисобини 6-дақиқада Кингсли Коман очди. 18-дақиқада эса Саша Буй жамоанинг иккинчи голини киритди. Орадан икки дақиқа ўтиб, Майкл Олисе ҳисобни янада йириклаштирди.
22-дақиқада Коман ўзининг иккинчи, жамоасининг эса тўртинчи голига муаллифлик қилди. Биринчи бўлим охирига келиб, немис клуби яна иккита гол урди: 45-дақиқада Томас Мюллер “Окленд Сити” дарвозасини ишғол қилган бўлса, 45+3-дақиқада Олисе олтинчи бор янги зеландияликлар дарвозабонини хафа қилди. Илк тайм 6:0 ҳисобида “Бавария” фойдасига якунланди.
Иккинчи бўлим нисбатан сокин бошланди. Бироқ кейинчалик “немис машинаси” яна 4 та гол киритишга муваффақ бўлди. 61-дақиқада захирадан майдонга тушган Жамол Мусиала хет-трикни расмийлаштирди. Яна бир голга Томас Мюллер муаллифлик қилди.
Шу тариқа, “Бавария” Клублар ўртасидаги Жаҳон чемпионатини ўта йирик ҳисобдаги ғалаба билан бошлади.
Клублар ўртасидаги Жаҳон чемпионати
C гуруҳи, 1-тур
15 июнь, якшанба
“Бавария” — “Окленд Сити” 10:0
Голлар: 1:0 — Коман (6), 2:0 — Буй (18), 3:0 — Олисе (20), 4:0 — Коман (22), 5:0 — Мюллер (45), 6:0 — Олисе (45+3), 7:0 — Мусиала (67), 8:0 — Мусиала (73), 9:0 — Мусиала (84), 10 — Мюллер (89).
Изоҳ (0)