Ғарбий Қозоғистон вилоятида чигирткаларга қарши курашда илк бор агродронлардан фойдаланилади. Улар 300 минг гектардан ортиқ қишлоқ хўжалиги ерларига ишлов бериши керак. Бу ҳақда 24.kz хабар берди.
Ҳудудий инспекцияга кўра, 2025 йил зараркунандалар сони энг юқори даражага чиқади. Мутахассислар буни 12 йиллик биологик цикл билан боғламоқда. Шу сабабли ҳудудда ишлов бериш кўлами сезиларли даражада кенгайтирилган. 2024 йилда зараркунандаларга қарши курашда ўз вақтида кимёвий моддалар қўлланганди.
2022 йилда ҳам аҳвол жуда оғир эди. Чигирткалар жуда катта зарар етказди. Ўтган йили биринчи ҳужум кузатилди. Ҳозир эса пудратчилар келган — ёнимизда туришибди, кутишяпти. Заҳарли воситалар олиб келишган. Умид қиламизки, чигирткаларни йўқ қиламиз, дейди деҳқон хўжаликларидан бирининг раҳбари Эрик Есенгалиев интервьюда.
Далаларга ишлов беришга кичик авиация ҳам жалб қилинган.
Дрон — бу янги технология. Кузатув ва пуркаш дрон орқали амалга оширилади. У бевосита зарар етказилган жойга қўнади: машиналар юрмайди, у тепадан ишлов беради. Кузатиб, биологик самарадорлигини аниқлаймиз. Натижа бўлади, деб ўйлаймиз. Бизнинг асосий вазифамиз — экинларни, яйловларни, ерларни ҳимоя қилишдир. Тахминан, бир ой давомида чигирткалар ҳужумидан ҳимояланишимиз керак, дейди Қишлоқ хўжалиги вазирлиги вакили Камидулла Дуйсеналиев.
Таъкидланишича, 2025 йилда фитосанитария хизматлари 320 минг гектар майдонга ишлов бериши керак. Бунинг учун махсус техникалар тайёр. Об-ҳаво шароитини ҳисобга олган ҳолда, чигиртка личинкаларининг оммавий пайдо бўлиши май ойининг охирида кутилмоқда. Вазият тегишли хизматлар вакиллари томонидан назорат қилиб борилмоқда.
Изоҳ (0)