Ижтимоий тармоқларда Қашқадарё вилоятининг Деҳқонобод туманидаги экин майдонларини чигиртка тўдаси босгани айтилган видео тарқалди. Деҳқонобод тумани ҳокимлиги мазкур ҳолат ҳақида маълумот берди.
Аниқланишича, видео туманнинг «Отқамар» маҳалла фуқаролар йиғинида тасвирга олинган.
«Telegram мессенжеридаги каналларда Деҳқонобод туманидаги экин майдонларини чигирткалар босгани айтилган видео тарқалди. Мазкур ҳолат масъуллар томонидан ўрганиб чиқилди. Вилоят Фавқулодда вазиятлар бошқармаси, вилоят ўсимликлар карантини ва ҳимояси бошқармаси ҳамда унинг таркибидаги чигиртка ва тут парвонасига қарши курашиш хизмати ходимлари туман ҳокимлиги масъуллари билан бирга ўрганиш ишларини олиб борди», — дейилади ҳокимлик маълумотида.
Мутахассислар Туркманистондан кириб келган чигирткалар беш ёшга тўлгани, кўпайиш ва озиқланиш даври тугаганлиги туфайли аҳоли томорқаларига, қишлоқ хўжалигига зарар келтирмаслигини билдирган.
«Вазиятни ҳудудга бориб ўргандик. Мутахассислар томонидан суриштирув ишлари олиб борилди. Аниқланишича, шамол оқими туфайли қўшни Туркманистон Республикасидан кичкина чигирткалар тўдаси кириб келган. Аммо ушбу тўда беш ёшга тўлган, кўпайиш ва озиқланиш даври тугаганлиги туфайли аҳоли томорқаларига, қишлоқ хўжалигига зарар келтирмайди», — деди туман ҳокими ўринбосари Бахтиёр Бердиев.
Изоҳ (0)