Зарарли чигирткалар кўп тарқалган Қашқадарё, Сурхондарё, Жиззах, Навоий, Тошкент вилоятлари ва Қорақолпоғистон Республикасида кимёвий кураш ишлари давом этмоқда. Бу ҳақда Ўсимликлар карантини ва ҳимояси агентлиги маълум қилди.
Маълум қилинишича, 2022 йилда республика бўйича зарарли чигирткалар тарқалиши мумкин бўлган 580,3 минг гектардан ортиқ майдонда кимёвий ишлов ўтказилиши режалаштирилган. Бугунги кунгача мамлакат ҳудудида 292,6 минг гектар майдонда чигирткалар тарқалганлиги аниқланган. 284 минг гектар майдонда кимёвий ишловлар ўтказилган.
«Бундай жараёнлар Қашқадарё, Сурхондарё, Жиззах, Қорақалпоғистон Республикаси, Самарқанд, Навоий, Сирдарё, Бухоро, Андижон, Хоразм, Наманган, Фарғона вилоятлари ҳудудида кимёвий ишловлар ўтказилди. Энг катта ишлов берилган майдонлар ҳудуди Қашқадарё, Сурхондарё, Жиззах вилоятлари ҳамда Қорақолпоғистон Республикасига тўғри келади», — дейилади хабарда.
Таъкидланишича, зарарли чигирткаларнинг қўшни республикалардан учиб ўтиш хавфи ҳам мавжуд. Шуни инобатга олган ҳолда
- 28 март ва 2 апрель кунлари Ўзбекистон Ўсимликларни карантини ва ҳимояси агентлиги ҳамда Тожикистон Чигирткаларга қарши кураш бўйича давлат унитар корхонаси олим ва мутахассислари томонидан Тожикистоннинг Рудакий, Шахритус, Носири Ҳисрав туманларининг чегара ҳудудларида ва Ўзбекистоннинг Узун, Жарқўрғон, Қумқўрғон, Шўрчи ва Термиз туманларида;
- 26—27 май кунлари Туркистон вилоятининг Келес, Сариёғоч, Қазигурт туманларида;
- 31 май-3 июнь кунлари Ўзбекистон ва Тожикистон ишчи гуруҳлари томонидан Сўғд вилоятининг Истаравшон, Зафаробод ва Шахристон туманларининг чегарадош ҳудудларида ва Жиззах вилоятининг Янгиобод, Зомин туманларида зарарли чигирткаларни тарқалишини олдини олиш мақсадида ҳамкорликда кузатувлар олиб борилган. Шунингдек, қўшни мамлакатларнинг фитосанитар ххизматлари билан мониторингни давом эттириш ва натижалар юзасидан ахборот алмашинувини олиб боришга келишиб олинган.
Аввалроқ ижтимоий тармоқларда Қашқадарё вилоятининг Деҳқонобод туманидаги экин майдонларини чигиртка тўдаси босгани айтилган видео тарқалганди. Кейинроқ туман ҳокимлиги ҳолатга муносабат билдириб, Туркманистондан кириб келган чигирткалар қишлоқ хўжалигига зарар етказмаслигини маълум қилган эди.
Изоҳ (0)