Қозоғистоннинг Туркистон вилоятида чигирткаларга қарши курашга 70 та техника, тўртта самолёт жалб қилинди. Бу ҳақда вилоят ҳокимлигига таяниб, Tengrinews хабар берди.
Қарши кураш чоралари 70 та қуруқлик техникаси ҳамда 4 та қўшимча самолёт ёрдамида амалга оширилмоқда, айни пайтда сабзавот ва полиз экинлари атрофига барча зарур техникалар жамланган. Бугунги кунга қадар экинларга зарар етмаган, — дейилади хабарда.
Вилоятда тозаланган 260 минг гектардан ташқари 50 минг гектардан ортиқ майдонларда чигирткалар ўчоғи қайд этилган. Туркистон вилоятининг Арис шаҳри, Сариоғаш, Келес, Ўрдабасин ва Шардара туманларида қўшимча қарши кураш чоралари олиб борилмоқда.
Бош вазир ўринбосари Серик Жумангарин 8 июнь куни чигирткалар тарқалишига қарши курашиш бўйича марказий тезкор штаб йиғилишида мамлакатдаги чигирткалар билан боғлиқ вазиятни қуйидагича таърифлади:
Биз ҳеч қачон бу йилгидек катта миқдорда чигиртка босқинига дуч келмаганмиз ва унинг тарқалиши эҳтимоли оқибатларини етарлича баҳоламаяпмиз. Қишлоқ хўжалиги давлат инспекцияси қўмитасига барча процессуал масалаларни тезда якунлаш ва зарур бўлган техникани зарур ҳудудларга юбориш вазифасини топшираман, — деган у.
Бухорога ҳам чигирткалар ҳужум қилди
Бухоро вилоятининг Ромитан туманида бир неча кундан буён чигирткалар босқини кузатилмоқда. Ромитан туманидан кесиб ўтувчи А-380 Бухоро—Хоразм автомобиль йўлининг Газли шаҳарчасига яқин қисмида зараркунандалар кўпайгани акс этган видеолар ижтимоий тармоқларда тарқалди. Расмийлар қишлоқ хўжалиги ва инфратузилмага зарар етказмаслиги учун чигирткаларга қарши кураш чораларини кўрмоқда. Тошкент вилоятига қўшни Қозоғистоннинг жанубий вилояти Туркистонда чигирткалар тўдалари ҳаддан ташқари кўпайган.
Изоҳ (0)