Айримлар коронавирусга қарши қўлланилаётган баъзи вакциналар таркибида ҳаром нарсалар борлигини айтмоқда. Шундай вакцинадан фойдаланиш мумкинми? Ўзбекистон мусулмонлари идораси Фатво ҳайъати бунга жавоб берди.
Фатво ҳайъати жавобида таъкидланишича, вакцина таркибида ҳаром маҳсулотлар борлиги ҳақидаги гаплар ҳеч қандай илмий далиллар билан исботланмаган. Мабодо вакцина таркибида шундай қўшимчалар бўлган тақдирда ҳам, у моддалар кимёвий реакциялар натижасида ўз аслини бутунлай йўқотган бўлса, унинг ҳаромлиги қолмайди ва ундан фойдаланиш жоиз бўлади.
«Буни шариатимизда истиҳола (яъни, бир модда бутунлай таркиби ўзгариб, бошқа нарсага айланиб кетиши) дейилади. Шу қоидага биноан, дорилар таркибида ўз асли — ҳаромлигини йўқотган моддалар бўлса-да, улардан фойдаланиш мумкин.
Қолаверса, Мисрдаги ‘Дорул-ифтў фатво уюшмаси, Бирлашган Араб Амирликларидаги Исломий ишлар идорасининг Шаръий фатво кенгаши ва дунёдаги бошқа йирик фатво ҳайъатлари коронавирусга қарши вакциналарда ҳаром ҳукмидаги маҳсулотлар қўшилган бўлса ҳам истиҳола қоидасига биноан мусулмонлар учун эмланиш жоиз бўлиши ҳақида фатво чиқарганлар. Валлоҳу аълам», — деб таъкидланган Фатво ҳайъати жавобида.
Бундан аввал Ўзбекистон мусулмонлари идораси вакцина олишнинг ҳукмини тушунтирганди.
Изоҳ (0)