Ўзбекистон ва Тожикистон мутахассислари ҳамкорлигида чегара ҳудудларида зарарли чигирткага қарши мониторинг олиб борилди. Бу ҳақда Қишлоқ хўжалиги вазирлиги матбуот хизмати хабар берди.
Қайд этилишича, уч кун давомида икки давлатнинг чегарадош ҳудудларида зарарли чигирткаларни ривожланиши ва тарқалган ўчоқларини аниқлаш мақсадида Тожикистоннинг Рудакий, Шахритус, Носири Ҳисрав туманларининг чегара ҳудудларида ва Ўзбекистоннинг Узун, Жарқўрғон, Қумқўрғон, Шўрчи ва Термиз туманларида зарарли чигирткаларни тарқалиши, ривожланиши ва кураш тадбирларини бажарилиши бўйича кузатувлар амалга оширилган.
Чўл зоналарда олиб борилган мониторинг тадбирлари билан биргаликда ҳамкорлик тўғрисида келишув имзоланган. Томонлар чегарадош ҳудудларда фитосанитария ҳолати, чигирткалар тарқалишининг прогнози ва кимёвий ишлов бериш ҳажми тўғрисидаги ахборот алмашинувини йўлга қўйиш ҳамда чегарадош бўлган ҳудудларда зарарли чигирткаларнинг тарқалиш хавфи юзага келса қарши кураш тадбирларини ўз муддатида олиб боришга келишиб олинган.
Маълумот учун, 2024 йилда 574,8 гектар майдонда кимёвий ишлов ўтказилиши прогнози қилинган. Барча техника шай ҳолга келтирилиб, жами 185 та трактор (ОВX ва ВП-1) пуркагичлар, 435 та моторли қўл аппаратлари, 31 та юқори унумли пуркагичли махсус автомашиналар, 25 та сув ташиш техникалари қарши кураш тадбирларини олиб бориш учун ҳозирланган.
Эслатиб ўтамиз, 2022 йилнинг май ойида ижтимоий тармоқларда Қашқадарё вилоятининг Деҳқонобод туманидаги экин майдонларини чигиртка тўдаси босгани айтилган видео тарқалганди. Кейинроқ туман ҳокимлиги ҳолатга муносабат билдириб, Туркманистондан кириб келган чигирткалар қишлоқ хўжалигига зарар етказмаслигини маълум қилган.
Изоҳ (0)