Бухоро ва Хоразм вилоятларини боғловчи А-380 автомобиль йўлини чигирткалар босгани акс этган видеолар тарқалди. Ўсимлик карантини ва ҳимояси агентлиги бу саксовул букри чигирткаси тўдаси эканини маълум қилди.
Агентлик берган маълумотга кўра, видеода акс этган ҳолат Бухоро вилоятининг А-380 автомобиль йўлининг 327-километрида кузатилган. Чигирткалар тўдасини ўз вақтида талафотларсиз бартараф этиш мақсадида Бухоро вилоятининг чигиртка ва тут парвонасига қарши кураш хизмати иккита отрядга бўлинган ҳолда кимёвий ишловларни 24/7 режимида олиб бормоқда.
“Алоҳида қайд этиб ўтамиз, саксовул букри чигирткаси қишлоқ хўжалиги экинларига зарар етказмайди”, дейилади хабарда.
Қайд этилишича, Бухоро вилоятининг Газли массиви, Ромитон, Қоракўл, Тойлоқ туманлари алоҳида назоратга олинган бўлиб, кузатув-мониторинг ишлари ҳам давом этмоқда. Республика бўйича зарарли чигиртка билан боғлиқ вазият назорат остида бўлиб, 10 май ҳолатига кўра, 472 минг 739 гектар майдонда кузатув олиб борилди. Мониторинг натижасида 267 минг 267 гектар майдонда зарарли чигиртка тарқалгани аниқланди. Шундан 244 минг 530 гектарда кимёвий ишловлар ўтказилди. Жумладан, Бухоро вилоятида 4509 гектар майдонда кимёвий ишловлар ўтказилди.
-0YoSykKU.avif)
ФВВ матбуот хизмати хабарига кўра, Бухоро вилоятининг бир нечта ҳудудларида зарарли чигирткалар тарқалгани бўйича вилоят ФВБга хабар келиб тушган. Хабарга кўра, вилоят ФВБ, Ўсимликлар карантини ва ҳимояси агентлиги ҳамда бошқа ҳамкор ташкилотлар воқеа жойига етиб бориб, улар томонидан ушбу ҳудудларда 15 та махсус техника ёрдамида кимёвий ишловлар берилган. Ҳозирда вилоят ҳудудида зарарли чигирткалар билан боғлиқ вазият тўлиқ назоратга олинган.
Кузги ва баҳорги кузатувлар натижасида 2025 йилда 608 минг гектар майдонда чигиртка тарқалиши прогноз қилинган. Бироқ иқлим ўзгариши, йил сайин ҳаво ҳароратининг ошиб бораётгани зарарли чигирткалар майдони кенгайишига олиб келиши мумкин.
Зарарли чигирткагақарши кураш тизими такомиллаштирилиб, мониторинг ва ишлов берилган майдонлар ҳудудларида “Локуст.уз” платформасига киритилиб, электрон хариталар ҳам шакллантирилмоқда.
Чигиртка босқини билан боғлиқ барча мурожаатларни ўз вақтида бартараф этиш мақсадида ҳудудларда тезкор штаблар ташкил этилиб, чигиртка хизмати 24/7 режимига ўтказилган. Фуқаролар зарарли чигиртка тарқалган ҳудуд ҳақида 1288 ёки 71 202 10 00 рақамлари орқали хабар бериши мумкин. Хизматлар ва кимёвий воситалар мутлақо бепул.
Изоҳ (0)