“Саросимага ўрин йўқ”. Бухоро вилоятида чигирткалар галаси бартараф этилгани маълум қилинди

Бухоро вилоятининг Ромитан туманида чигирткалар босқини кузатилгани аҳоли ўртасида саросимага сабаб бўлганди. Ўсимликлар карантини ва ҳимояси агентлиги матбуот котиби Сабина Садинова ҳолат бартараф этилганини маълум қилди.

Бир неча кун аввал Қозоғистон ҳудудида мисли кўрилмаган даражада зарарли чигирткалар тарқалгани ҳақида хабарлар эълон қилинган эди. Сабина Садинованинг билдиришича, вазият Ўзбекистон ҳудудида фавқулодда ҳолат тусини олмаслиги учун қўшни давлат билан трансчегаравий ҳудудларда, хусусан, Навоий Тошкент вилоятлари ҳамда Қорақалпоғистон Республикасида назорат кучайтирилди.

“Чигирткалар хавфини бартараф этиш мақсадида БМТнинг FAO дастури доирасида қўшни давлатларда тизимли иш ташкил қилиш таклифи айнан агентлик томонидан илгари сурилган эди. Шунингдек, зарарли чигирткалар тарқалиши хавфи юқори бўлган Туркманистон билан трансчегаравий ҳудудлар — Бухоро ва хоразм вилоятларида ҳам назорат кучайтирилди. Мониторинг жараёнида Бухоро вилоятининг Ромитан, Қоракўл, Олот ва Жондор туманларида чигиртка тарқалгани аниқланган бўлиб, ўша куннинг ўзида кимёвий ишлов олиб борилди”, — дейди агентлик матбуот котиби.

Ҳозирда Бухоро вилояти Ромитан туманининг Газли массивида зарарли ҳашарот тарқалиши хавфи бартараф этилган.

Сабина Садинованинг маълум қилишича, бугунги кунга қадар Бухоро вилоятида 12 321 гектар майдонда кимёвий кураш тадбирлари олиб борилган. Шунингдек, қўшни Хоразм вилоятида ўчоқларини олдини олиш мақсадида 3 272 гектарда кимёвий ишлов ўтказилди. Зарарли чигирткаларга қарши кураш мавсумини беталофат ўтказиш учун моддий техник база яратилган бўлиб, ёқилғи кимёвий воситалар захираси жамғарилган.

“Шу ўринда таъкидлаб ўтмоқчимиз саросимага ўрин йўқ вазият назорат остида”, — дейди Ўсимликлар карантини ва ҳимояси агентлиги матбуот котиби.

ФВВ матбуот хизмати берган ахборотга кўра, баҳор-ёз мавсумида республика ҳудудларида вазирлик раҳбарлигида тегишли ташкилотлар билан ҳамкорликда зарарли чигирткага қарши курашиш ишлари ҳар йили тизимли равишда амалга оширилади. Хусусан, мавсум бошланишидан олдин ҳашаротлар тарқалиш имкони мавжуд бўлган жойлар аниқланиб, махсус техникалар ёрдамида кимёвий ишловлар амалга оширилиб келинмоқда.

Айни кунларда бундай ишлар Сурхондарё, Қашқадарё, Бухоро, Жиззах, Тошкент, Наманган вилоятларида олиб борилмоқда.