G‘arbiy Qozog‘iston viloyatida chigirtkalarga qarshi kurashda ilk bor agrodronlardan foydalaniladi. Ular 300 ming gektardan ortiq qishloq xo‘jaligi yerlariga ishlov berishi kerak. Bu haqda 24.kz xabar berdi.
Hududiy inspeksiyaga ko‘ra, 2025-yil zararkunandalar soni eng yuqori darajaga chiqadi. Mutaxassislar buni 12 yillik biologik sikl bilan bog‘lamoqda. Shu sababli hududda ishlov berish ko‘lami sezilarli darajada kengaytirilgan. 2024-yilda zararkunandalarga qarshi kurashda o‘z vaqtida kimyoviy moddalar qo‘llangandi.
2022-yilda ham ahvol juda og‘ir edi. Chigirtkalar juda katta zarar yetkazdi. O‘tgan yili birinchi hujum kuzatildi. Hozir esa pudratchilar kelgan — yonimizda turishibdi, kutishyapti. Zaharli vositalar olib kelishgan. Umid qilamizki, chigirtkalarni yo‘q qilamiz, deydi dehqon xo‘jaliklaridan birining rahbari Erik Yesengaliyev intervyuda.
Dalalarga ishlov berishga kichik aviatsiya ham jalb qilingan.
Dron — bu yangi texnologiya. Kuzatuv va purkash dron orqali amalga oshiriladi. U bevosita zarar yetkazilgan joyga qo‘nadi: mashinalar yurmaydi, u tepadan ishlov beradi. Kuzatib, biologik samaradorligini aniqlaymiz. Natija bo‘ladi, deb o‘ylaymiz. Bizning asosiy vazifamiz — ekinlarni, yaylovlarni, yerlarni himoya qilishdir. Taxminan, bir oy davomida chigirtkalar hujumidan himoyalanishimiz kerak, deydi Qishloq xo‘jaligi vazirligi vakili Kamidulla Duysenaliyev.
Ta’kidlanishicha, 2025-yilda fitosanitariya xizmatlari 320 ming gektar maydonga ishlov berishi kerak. Buning uchun maxsus texnikalar tayyor. Ob-havo sharoitini hisobga olgan holda, chigirtka lichinkalarining ommaviy paydo bo‘lishi may oyining oxirida kutilmoqda. Vaziyat tegishli xizmatlar vakillari tomonidan nazorat qilib borilmoqda.
Izoh (0)