Финляндия президенти Александр Стубб Совет-Финляндия уруши оқибатида Финляндия ҳудудларининг бир қисми Совет иттифоқига ўтгани ҳақида норозилик билдирди. У бу ҳақда Хелсинкида Украина президенти Владимир Зеленский билан биргаликда ўтказилган матбуот анжуманида маълум қилган.
“Мен давлатчиликнинг асоси одатда уч устунда қурилади деб ҳисоблайман: мустақиллик, суверенитет ва ҳудудий яхлитлик. Финляндия 1944 йилда Сталин билан тинчлик шартномасини имзолаганидан сўнг, бу устунлардан иккитасини йўқотди.
Биз мустақилликни сақлаб, амалда Совет иттифоқининг ягона қўшниси бўлиб қолдик. Аммо биз суверенитетни ва қарор қабул қилиш ҳуқуқини, шунингдек, ҳудудимизнинг ўн фоизини ҳам йўқотдик. Бу бобом, бувим ва отам туғилган ҳудудлар эди. Шундай экан агар Украина ҳам худди шундай вазиятга тушиши керакми, деган савол туғилса, менинг жавобим қатъиян йўқ”, деди Стубб.
1944 йил 19 сентябрда СССР ва Буюк Британия бир томондан ва Финляндия бошқа томондан 1941-1944 йиллардаги Совет-Финляндия урушини амалда якунлаган Москва сулҳини имзолаган. Москва сулҳининг шартларидан бири 1940 йилги тинчлик шартномасига мувофиқ чегарани белгилаш эди. Унга кўра Финляндия ўз ҳудудининг ўндан бир қисмини СССРга бериши ва СССРга қарши коалицияларда иштирок этмаслик мажбуриятини олиши керак эди. Шартномага мувофиқ, Карелиа бўғозидаги чегара Ленинграддан 120-130 километрга сурилган. Виборг шаҳри билан бутун Карелиа бўғози, Виборг қўлтиғи ва унинг ороллари, Ладога кўлининг ғарбий ва шимолий қирғоқлари, Фин қўлтиғидаги бир қанча ороллар, Рибачий ва Средний ярим оролларининг бир қисми Совет иттифоқига ўтган.
Изоҳ (0)