Германия пойтахти Берлинда 8 ва 9 май кунлари Трептов боғи ва унга туташ ҳудуддаги совет аскарлари ёдгорлиги ёнида СССР байроқларини намойиш этиш тақиқланди. Бу ҳақда Deutsche Welle хабар берди.
Тегишли қарор Берлин маъмурий суди томонидан қабул қилинган. Шаҳар полицияси 2 май куни бир қатор ёдгорликлар ҳудудида Россияга алоқадор бўлган байроқларни намойиш этишни тақиқлаган. Бироқ жамоат бирлашмаларидан бири “йиғилишлар эркинлиги ҳуқуқини чеклаш” даъвоси билан судга мурожаат қилган. Судда илтимоснома рад этилган ва полиция тақиқи амалдаги қонунларга зид эмаслиги таъкидланган.
Полициячилар қарорининг мақсади жамоат тартибини ва “хотира тадбирларининг муносиб ўтказилишини” таъминлаш экани айтган. Шу сабаб маълум бир рамзларга нисбатан тақиқ ўринли деб топилган.
Украинага қарши давом этаётган агрессив уруш сабабли Совет байроқлари бошқа рамзлар қатори зўравонликка тайёрликни англатувчи маъно касб этиши мумкин. Бугунги вазиятда СССР байроқлари ҳар қандай ҳолатда урушни қўллаб-қувватлаш ифодаси сифатида идрок этилиши эҳтимоли бор, дейилади ҳужжатда.
Таъкидланишича, юзага келадиган “ғалабали юриш таассуроти” қурбонларнинг қадр-қимматини камситади ва жамоат тартибига хавф солади. Қарор устидан Берлин ва Бранденбург Олий маъмурий судига шикоят қилиниши мумкин.
Изоҳ (0)