Франция ҳукумати Telegram мессенжери асосчиси Павел Дуровнинг “инвестиция фондлари билан музокаралар ўтказиш” учун АҚШга бориш ҳақидаги сўровини рад этди. Бу ҳақда Politico хабар бермоқда.
Маълум қилинишича, Париж прокуратураси 12 май куни унинг сўровини “чет элга бундай сафар зарурий ёки асосли эмас”, деган важ билан рад этган.
Дуров 2024 йил 24 август куни Парижнинг Ле Бурже аэропортида Telegram орқали содир этилган ноқонуний ҳаракатларда иштирок этганликда гумонланиб қўлга олинган. 28 август куни тадбиркор суд назоратига олиниб, унга 5 миллион евро миқдорида гаров пули тўлаш мажбурияти юкланган.
Суд қарорга асосан Дуровга Франциядан чиқиш тақиқланган бўлиб, агар хорижий мамлакатларга сафар қилиши лозим бўлса, рухсат сўраши лозим. У шу кунга қадар 2025 йилнинг 15 мартидан 7 апрелгача Дубайга бориш учун бундай рухсат олган.
Маълумотларга кўра, Дуров Россияда туғилган бўлса-да, Франция ва БАА фуқароси ҳисобланади.
Дуров ҳибсга олинганидан бери Франция ҳукуматини танқид қилиб келмоқда. Яқинда у Руминияда президентлик сайловлари иккинчи босқичи арафасида Франция разведкаси раҳбари Николас Лернер ундан Telegram орқали консерватив овозларни тўсишни сўраганини айтди. Франция ҳукумати эса Дуровнинг бу даъволарини қатъий рад этди.
Изоҳ (0)