Франция жанубидаги Окситания минтақасининг бир нечта шаҳарларида 200 дан ортиқ фермер қишлоқ хўжалиги соҳасидаги чекловларни юмшатишга қаратилган янги қонун лойиҳасини қўллаб-қувватлаш учун намойишларда иштирок этди. Бу ҳақда France Presse агентлиги хабар бермоқда.
“Пайшанба куни кечқурун фермерлар Окситаниянинг бир нечта шаҳарларида тўпланиб, уларнинг касбий фаолиятидаги “чекловларни бекор қилиш”га ва айниқса, пестицидлардан фойдаланишни осонлаштиришга қаратилган Диплом қонун лойиҳасини қўллаб-қувватладилар”, дея таъкидлайди агентлик.
Баъзи фермерлар тиркамали тракторларда келиб, Монтобан шаҳрида намойиш ўтказишди. У ерда полиция ходимлари фермерларнинг социалистлар партияси штаб-квартираси олдига гўнг тўкишга уринишларининг олдини олиш учун сафарбар этилди.
Яна бир намойиш Родез шаҳрида бўлиб ўтди. У ерда 10 га яқин фермер аэропорт яқинидаги айланма йўлга сомон ғарамларини тўкиб ташлади ва ўзлари “ҳаётий муҳим” деб ҳисоблаган янги қонун лойиҳасини тўсиб қўймасликка чақирувчи катта баннер осиб қўйди.
Намойиш ташкилотчилари ҳозирда олиб борилаётган баҳорги қишлоқ хўжалиги ишлари туфайли кўп сонли иштирокчиларни кутмаганликларини, аммо бу ҳали бошланиши эканлигини таъкидлашди.
Бир кун олдин FNSEA етакчи фермерлар касаба уюшмаси раҳбари Арно Руссо ҳукумат ўз ваъдаларини бажармагани учун фермерлар 26 майдан бошлаб норозилик намойишларини қайта бошлашини маълум қилган.
Изоҳ (0)