Франция президенти Эммануэл Макрон 2018 йил тушлик пайти Telegram асосчиси Павел Дуровга компаниянинг штаб-квартирасини Парижга кўчиришни таклиф қилган. Бу ҳақда манбаларга таяниб, The Wall Street Journal хабар берди.
![](/static/2024/08/28/photo_2024-08-28_14-13-19-HIPoi6BO.jpg)
Ўшанда Дуров Франция президентига рад жавобини берган. Макрон ўша суҳбатда Telegram штаб-квартирасини кўчиришдан ташқари, Дуровга фуқаролик бериш масаласини ҳам муҳокама қилгани айтилмоқда.
2017 йилда, яъни Макрон ва Дуров учрашувидан бир йил олдин, Франция махсус хизматлари Араб Амирликлари билан ҳамкорликда Purple Music номи остида операция ўтказган, унинг давомида Telegram асосчиси iPhoneъига бузиб кирилган, деб ёзмоқда WSJ.
Ўша пайтда Франция ҳукумати ИШИД Дуров асос солган мессенжердан ўз сафларига аъзо ёллаш ва ҳужумларни режалаштириш учун фойдаланиши мумкинлигидан ташвишда бўлган.
WSJ манбаларига кўра, Telegram узоқ вақт давомида компаниянинг электрон почтасига Франциядан келган суд чақирувлари ва қарорларини эътиборсиз қолдирган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Дуровнинг ҳибсга олиниши
Telegram асосчиси 24 август куни Озарбайжондан Парижга шахсий самолётида борганда Ле Бурже аэропортида қўлга олингани хабар берилганди. У француз ҳуқуқ-тартибот идоралари ходимлари билан Telegram’да кибер ва молиявий жиноятлар масалаларида ҳамкорлик қилишдан бош тортганликда айбланмоқда. Франция полицияси вакилига кўра, Дуров ҳозирда миллий кибержиноятчилик ва фирибгарликка қарши кураш бошқармаси томонидан тергов қилинмоқда. Мессенжер асосчиси ҳамон ҳибсда сақланмоқда.
Telegram компанияси муносабати
Компаниянинг таъкидлашича, Telegram “Европа Иттифоқи қонунларига тўлиқ риоя қилади”, контентни модерация қилиш эса “соҳа стандартларига мос келиб, доимий равишда такомиллаштирилмоқда”. Шунингдек, компания бош директорининг “яшириш учун ҳеч нарсаси йўқлиги ва у мунтазам равишда Европа бўйлаб саёҳат қилиши” айтилган.
Дуров ёки платформа Telegram фойдаланувчиларнинг суиистеъмолликлари учун жавобгар экани ҳақидаги даъволарни Telegram жамоаси “абсурд” деб атаган.
“Бутун дунё бўйлаб қарийб бир миллиард фойдаланувчи Telegram’ни алоқа воситаси ва муҳим маълумотлар манбаи сифатида ишлатади. Биз ушбу вазиятнинг тез орада ҳал этилишини кутмоқдамиз. Telegram ҳар доим сиз билан”, дейилади муносабатда
Франция президенти нима демоқда?
“Павел Дуров ҳибсга олинганидан кейин Франция ҳақидаги ёлғон маълумотларни ўқияпман. Франция сўз ва мулоқот эркинлиги, инновациялар ва тадбиркорликка содиқдир. Telegram раҳбарининг Франция ҳудудида ҳибсга олиниши давом этаётган суд тергови доирасида амалга оширилди”, деди Макрон Х ижтимоий тармоғидаги саҳифасида.
Маълумот ўрнида, Telegram асосчиси Россиядан ташқари, Сент-Китс ва Невис, БАА ва Франция фуқаролигига эга. Амирликлар ва Россия Ташқи ишлар вазирлиги Францияни уларнинг ҳам фуқароси ҳисобланган Дуровга консуллик хизматини тақдим этишни сўраган.
Изоҳ (0)