Telegram асосчиси Павел Дуров Францияда ҳибсга олинганидан кейин унга Россия ва Бирлашган Араб Амирликлари томонидан таклиф қилинган дипломатик ёрдамдан бош тортди. Бу ҳақда француз расмийсига таяниб Politico хабар берди.
“У Россия консуллиги ҳимоясидан ва БАА консуллик ташрифидан бош тортди, лекин БАА элчихонасини ўз аҳволидан хабардор қилиб туришга рози бўлди”, дейди франциялик расмий.
БАА дипломатик хизмати ходими нашрга дипломатлар Франция расмийлари билан ҳам, Павел Дуров вакиллари билан ҳам алоқада эканлигини тасдиқлаган. Россиянинг Франциядаги элчихонаси бу ҳақда изоҳ бермаган.
Павел Дуров Россия, Бирлашган Араб Амирликлари, Франция ҳамда Кариб денгизи оролларида жойлашган Сент-Киц ва Невис штати фуқаролигига эга.
Дуров 24 август куни Парижда қўлга олинганидан сўнг Россиянинг Франциядаги элчихонаси россиялик дипломатларга киришига рухсат беришни талаб қилган. Дуровга Telegram’даги фирибгарларнинг ҳаракатлари ва мессенжернинг Франция расмийлари билан ҳамкорлик қилишдан бош тортгани билан боғлиқ олтита банд бўйича айблов қўйилган. 28 август куни Дуров суд назорати остида 5 миллион евро гаров эвазига қўйиб юборилган ва Францияни тарк этиши тақиқланган. Шунингдек, унинг акаси Николай Дуровга ҳам мамлакатда қидирув эълон қилингани ҳақида хабар берилган.
6 сентябрга ўтар кечаси Павел Дуров биринчи марта ўзи билан бўлаётган воқеаларга расман изоҳ берди. Дуровнинг сўзларига кўра, мессенжерда учинчи шахслар томонидан содир этилган жиноятларда уни айблаш хато бўлган. Бироқ у Telegram жиноятчиликка қарши курашда кўпроқ чоралар кўришини айтмоқда. Париж полицияси Дуровни тўрт кун давомида сўроқ қилган. У Франция расмийларининг даъволарини ҳайратланарли деб атаган.
Изоҳ (0)