Telegram асосчиси Павел Дуров Швейцарияда уч фарзандининг онаси Ирина Болгарнинг даъвоси бўйича қўзғатилган жиноий ишда гумон қилинмоқда, дея Forbes хабар берди.
![](/static/2024/08/28/photo_2024-08-28_17-53-20-abkuwgIE.jpg)
2023 йилнинг март ойида Женевада берилган даъвода Дуров ўз фарзандларидан бирига жисмоний зўравонлик қилгани айтилган. Бундан бир оз аввал Болгар Дуровни унга ойига 150 минг евро миқдорида алимент тўлашни тўхтатганликда айблаган.
Женева суди вакилига кўра, Дуров 2017 йилда туғилган кенжа ўғлига нисбатан 2021 йилдан 2022 йилгача 5 марта зўравонлик қўллаган. Ҳодисалар натижасида болада жароҳатлар, жумладан мия чайқалиши ва уйқу бузилиши содир бўлган. Далиллар орасида Болгар ва Дуров ўртасидаги хабарларнинг стенограммаси ҳамда 2023 йил апрелида боланинг зўравонлик туфайли ташвиш ва уйқу муаммоси борлигини тасдиқловчи тиббий маълумотнома илова қилинган.
Ирина Болгарнинг адвокати унинг суд жараёнидаги иштирокини тасдиқлаган, аммо тафсилотларни ошкор қилишдан бош тортган.
Швейцария қонунчилигига кўра, Болгар ва болаларнинг исмлари даъво аризасида тилга олинмаган, бироқ унда Дуровнинг шахсини аниқлаш имконини берувчи тафсилотлар келтирилган”, дея қайд этади Forbes.
Болгарнинг таъкидлашича, Дуров 2022 йил сентябрь ойида фарзандлари билан кўришишни тўхтатган, кейин эса алимент тўлаш тўхтатилган. 2024 йил июнь ойида Болгарнинг адвокатига кўра, алимент ундириш учун фуқаролик даъвоси билан судга мурожаат қилган, аммо бу борада ҳали қарор қабул қилинмаган.
Бундан ташқари, 2023 йил апрель ойида Болгар ҳам болаларнинг ягона васийлигини талаб қилиб судга даъво қилган. Май ойида суд Дуровнинг фарзандларига нисбатан ота-оналик ҳуқуқини тўхтатган. Forbes’га кўра, у бу қарорга қарши чиқмаган.
Аввалроқ Дуров сперма донори, кейин эса 100 дан ортиқ боланинг биологик отаси бўлганини маълум қилган эди. Шунингдек, Россия ОАВлари Дуровнинг 2009 ва 2010 йилларда туғилган икки катта фарзанди, бир қизи ва бир ўғли ҳам борлиги ҳақида хабар берган.
Telegram асосчиси 24 август куни Париж аэропортида қўлга олинган эди. Франция прокуратураси унга нисбатан 12 та айблов, жумладан, ваколатли органлар сўровига кўра маълумот беришдан бош тортиш, шунингдек, порнография ва гиёҳванд моддаларни тарқатишда иштирок этиш бўйича жиноий тергов эълон қилган.
Изоҳ (0)