Telegram Дуров ҳибсга олинганидан кейин нафақат Франция, балки бошқа мамлакатларнинг ҳуқуқ-тартибот идоралари билан ҳамкорлик қила бошлади. Бу ҳақда Le Figaro ва Liberation хабар берди.
Хусусан, Европа иттифоқининг номи ошкор этилмаган давлати юзга яқин қотилликлар муҳокама қилинган Telegram гуруҳи бўйича сўровига жавоб олишга муваффақ бўлган. Жанубий Кореядан келган сўровга ҳам жавоб кутилмоқда.
Францияда эса мессенжер вояга етмаганлар миллий полиция бошқармаси (Ofmin) томонидан бир нечта жиноий терговларда берилган сўровларга жавоб берди ва баъзи гумондорларни аниқлаши мумкин бўлган материалларни тақдим этди.
Дуровнинг ҳибсга олиниши
Telegram асосчиси 24 август куни Озарбайжондан Парижга шахсий самолётида борганда Ле Бурже аэропортида қўлга олинди. У француз ҳуқуқ-тартибот идоралари ходимлари билан Telegram’да кибер ва молиявий жиноятлар масалаларида ҳамкорлик қилишдан бош тортганликда айбланди.
Париж суди уни платформага алоқадор аввал эълон қилинган 12 та ҳуқуқбузарликдан 6 тасида, жумладан, ҳукумат билан ҳамкорлик қилишдан бош тортишда, болалар порнографиясини тарқатишда, наркотрафикда иштирок этишда, шунингдек, уюшган гуруҳ таркибидаги фирибгарликда айблади. 29 август куни у 5 миллион евро миқдорида гаров тўлаш, ҳафтада икки марта полиция участкасига келиш, Францияни тарк этмаслик шарти билан озод қилинди.
Liberation нашрининг ёзишича, Дуров сўроқ пайтида Франция контрразведкаси билан махсус алоқа канали борлигини, бу орқали бир неча терактларнинг олди олинганини айтган. Шу билан бирга, манбалар газетага маълум қилишларича, 2013 йилдан 2024 йилгача Франция полицияси Telegram’дан 2460 та сўровга жавоб олмаган.
Изоҳ (0)