Нидерландия ташқи ишлар вазири Вопке Хукстра Россиянинг Украинадаги ҳаракатларини текшириш учун мамлакатда махсус трибунал ўтказишга тайёрлигини маълум қилди. Бу ҳақда Нидерландия радиоэшиттириш корпорацияси (НОС) маълум қилди.
«Агар трибунал яратиш зарурати бор бўлса, уни Гаагада очиш мумкин», — деди ТИВ раҳбари.
Унинг сўзларига кўра, Нидерландия Европа Иттифоқи билан биргаликда ушбу трибунал учун халқаро ҳамжамиятдан сиёсий ва молиявий ёрдам сўрайди. Хукстранинг фикрича, янги суд март ойидан бери Украинада уруш жиноятлари ва инсониятга қарши жиноятларни тергов қилаётган Гаага халқаро жиноят суди ишига халал бермаслиги керак.
НОС қайд этганидек, трибунални яратиш учун БМТ Хавфсизлик кенгашининг қарори талаб қилинади, бунда Россия доимий аъзо сифатида вето қўйиш ҳуқуқига эга.
Ноябрь ойи охирида Еврокомиссия раҳбари Урсула фон дер Ляйен БМТ кўмагида Россиянинг Украинадаги ҳаракатларини тергов қилиш ва жиноий жавобгарликка тортиш учун ихтисослаштирилган суд яратиш зарурлигини маълум қилганди. Унинг айтишича, Россия Украинага етказилган молиявий зарарни ҳам қоплаши керак, унинг ҳисоб-китобларига кўра, бу ҳозиргача 600 миллиард евродан ошган.
Ўша куни Франция Ташқи ишлар вазирлиги Брюссель ва Киев билан биргаликда Россиянинг Украинага қарши босқинчилик жинояти бўйича Махсус трибунал яратиш устида иш бошланганини эълон қилди.
Изоҳ (0)