АҚШ Россиянинг Украинадаги уруш жиноятлари бўйича қўшма халқаро трибунал яратиш тарафдори, деб маълум қилди Давлат департаменти матбуот котиби ўринбосари Ведант Пател.
“Қўшма Штатлар Украинага қарши босқинчилик жинояти бўйича Украина суд тизимига асосланган ва халқаро суд шаклида махсус трибунал ташкил этилишини қўллаб-қувватлайди”, — деди у.
Пателнинг сўзларига кўра, АҚШ трибунал кенг халқаро ёрдам олиши, айниқса европаликлар томонидан қўллаб-қувватланиши ва “идеал ҳолда” Европа давлатларидан бирида ўтказилиши керак, деб ҳисоблайди.
Ноябрь ойи охирида Еврокомиссия раҳбари Урсула фон дер Ляйен БМТ кўмагида Россиянинг Украинадаги ҳаракатларини тергов қилиш ва жиноий жавобгарликка тортиш учун ихтисослаштирилган суд яратиш зарурлигини маълум қилганди. Унинг айтишича, Россия Украинага етказилган молиявий зарарни ҳам қоплаши керак.
Ўша куни Франция Ташқи ишлар вазирлиги Брюссель ва Киев билан биргаликда Россиянинг Украинага қарши босқинчилик жинояти бўйича Maxсус трибунал яратиш устида иш бошланганини эълон қилди.
Кейинроқ Нидерландия Россиянинг Украинадаги ҳаракатлари бўйича трибунални ўз ҳудудида ўтказишга тайёрлигини маълум қилди.
Кремль махсус трибунал тузиш таклифини қоралаб, бундай жараён ноқонунийлигини таъкидлади.
Изоҳ (1)
Bu AQSH ni Iroq Suriya Erondagi shuncha odamni uldirib yuborgani uchin kim sudga berarkan?