Макрон уруш шароитида Украинанинг Европа Иттифоқи аъзолигини олишига қарши чиқди

Франция президенти Эммануэль Макрон Россия билан ҳарбий низо вақтида Украинанинг Европа Иттифоқи таркибига кириш жараёнини бошлашнинг имкони йўқ деб ҳисоблаши ҳақида гапирди. У бу ҳақда Версалда ЙИ мамлакатлари раҳбарларининг саммити олдидан журналистлар билан суҳбатда маълум қилган.

Франция давлат раҳбари ЙИ саммитида уч мамлакат — Украина, Молдова ва Грузиянинг иттифоқ таркибига кириш учун берган сўровлари муҳокама қилинади.

«Биз ҳозир ҳудудида уруш кетаётган мамлакатни ЙИ таркибига қабул қилиш жараёнини очиқчасига бошлай оламизми? Мен бунинг имкони йўқ деб ҳисоблайман»,— деган Макрон («РИА Новости» келтирган иқтибос).

Шунингдек, у Украинага эшик ёпиш ва бу ҳеч қачон амалга ошмайди деб айтиш ҳам нотўғри бўлишини таъкидлаган.

Макрон Молдовадаги вазиятга ҳам эътибор қаратган. У Россия газига қарам бўлган ушбу мамлакат ҳудудига Украинадан ўн минглаб қочоқлар келганини эслатган.

«Молдовани ушбу йўлда қолдириб кета олмаймиз»,— дея қўшимча қилган Франция президенти.

Аввал Болгария, Чехия, Эстония, Латвия, Литва, Польша, Словакия ва Словения каби давлатларнинг президентлари Украинанинг зудлик билан ЙИга аъзо бўлиш учун номзод мамлакат мақомини олишга ҳақли эканини баён қилган.

Еврокомиссия раиси Урсула фон дер Ляйен Украинанинг вақти келиб Европа Иттифоқига кириши кераклигини қайд этган. Аммо Европа Иттифоқи дипломатияси раҳбари Жозеп Боррел ЙИ етакчи мамлакатларининг раҳбарлари айни вақтда Украинани иттифоқ аъзолигига қабул қилиш масаласини кўриб чиқмаётганини маълум қилган.

10 март куни Reuters агентлиги ЙИ етакчилари иштирокидаги саммит декларациясига асосланиб Евроиттифоқнинг Украинадаги воқеалар туфайли Россия нефти, гази ва кўмиридан босқичма-босқич воз кечишни режалаштираётгани ҳақида хабар берган.