Коронавирус билан касалланиш ҳолатлари бутун жануби-шарқий Осиёда, айниқса Хитойнинг махсус маъмурий ҳудуди Гонконг ва Сингапурда тез суръатлар билан кўпаймоқда. Бу ҳақда The Independent хабар берди.
Гонконг соғлиқни сақлаш вакиллари касалланиш ҳолатлари сони кескин ошганини маълум қилган. Эпидемиянинг янги тўлқини бошлангани таъкидланмоқда. Касалланиш даражаси март ойи ўрталарида 1,7 фоиздан ҳозирда 11,4 фоизгача кўтарилиб, 2024 йил август ойида қайд этилган энг юқори кўрсаткичдан ошган.
Марказнинг юқумли касалликлар бўлими бошлиғи Алберт Ау айтишича, Гонконгда ҳозирда COVID-19 вирусининг фаоллиги “анча юқори” даражададир.
Сингапурда Соғлиқни сақлаш вазирлиги бир йил ичида илк бор COVID-19 билан касалланиш бўйича ҳисоботни эълон қилди. Унда 3 майда якунланган ҳафтада олдинги 7 кун билан солиштирганда касалланиш ҳолатлари сони 28 фоизга ошиб, 14 200 тага етгани маълум қилинган. Соғлиқни сақлаш вазирлиги ва юқумли касалликлар агентлиги касалланишнинг ўсишини диққат билан кузатаётганини билдирган. Кунлик касалхонага ётқизилганлар сони тахминан 30 фоизга ошган.
Мамлакатда айланиб юрган вирус турлари аввалгиларига қараганда юқумлироқ ёки касалликнинг оғирроқ кечишига сабаб бўлаётганига ҳеч қандай далил йўқ, дейилади вазирлик баёнотида.
Идоранинг баҳолашича, касалланишнинг кўпайиши иммунитетнинг сусайиши билан боғлиқдир. Сингапур коронавирус билан касалланиш ҳолатлари тўғрисидаги маълумотларни фақат сезиларли даражада кўпайгандагина эълон қилади. Шунингдек, Хитой ва Таиландда ҳам касалланишнинг ўсиши кузатилаётгани маълум қилинмоқда. Хитойда инфекциялар ўтган ёздаги энг юқори кўрсаткичга яқинлашмоқда.
Изоҳ (0)