Қозоғистоннинг Остона шаҳрида 7 май куни Ғалабанинг 80 йиллигига бағишланган ҳарбий парад бўлиб ўтди. Унда тўрт мингдан ортиқ ҳарбий хизматчи иштирок этди.
Парадда 200 дан ортиқ ҳарбий қурол-яроғ ва техника, жумладан, 66 та ҳарбий авиация самолёти ҳамда вертолёт намойиш этилди. Биринчи марта механизациялашган колонна таркибида “Бук”, “Тор” зенит-ракета комплекслари, “Барйс”, “Алан”, “Айбар”, “Таймас”, “Террекс” жанговар машиналари, шунингдек, миналарни зарарсизлантириш учун роботлар ўрнатилган махсус автомобиллар тақдим этилди.
Шунингдек, маҳаллий мудофаа саноати корхоналари ишлаб чиқаришни режалаштираётган жанговар машиналар, роботлаштирилган қайиқлар ва учувчисиз учиш аппаратлари намойиш этилди. Осмонда А-400 ҳарбий-транспорт самолёти, Л-410 йўловчи самолёти ва Б-300 патрул самолёти учиб ўтди.
Бу сўнгги 5 йил ичида Ғалаба кунига бағишланган биринчи ҳарбий параддир. Унда Вьетнам ҳукмрон партияси бош котиби То Лам рафиқаси билан бирга тадбирни трибунадан томоша қилди.
Қўшни республика 2020 ва 2021 йилларда коронавирус пандемияси туфайли парадни бекор қилган. 2022, 2023 ва 2024 йилларда эса харажатларни тежаш ва бошқа вазифалар туфайли парад ўтказилмаган.
Парад очилишида президент Қосим-Жўмарт Тўқаев баёнот берди. У мамлакат бўйлаб 500 га яқин кўчага қозоғистонлик жангчилар номи берилишини айтди.
Глобал сиёсатга тажовуз ва нафрат бациллалари кириб келган бугунги кунда давлатимизнинг барча фуқароларига уруш ҳақидаги бор ҳақиқатни етказиш жуда муҳимдир. Ҳақиқатсиз тинчлик қадрини билиб бўлмайди. Уруш ва буюк ғалабанинг аҳамияти ҳақидаги тарихий ҳақиқатни бузиб кўрсатишга йўл қўйиб бўлмайди, деди сиёсатчи.
Тўқаев глобал беқарорлик даврида Қозоғистон учун асосий вазифа миллий манфаатларни ҳимоя қилиш эканини таъкидлади.
Ташқи сиёсатимиз шу мақсадни таъминлашга қаратилган. Қозоқлар тинчликсевар, шу билан бирга жасур ва қатъиятли халқдир. Мамлакат мудофаа қобилиятини ошириш бизнинг устувор вазифамиз. Қуролли кучларни модернизация қилиш ва армия салоҳиятини мустаҳкамлаш бўйича қатъий йўл тутдик, деди у.
Сиёсатчи ўз нутқини “Ватанни ҳимоя қилиш — улкан масъулият”, дея якунлади. У бу ҳар бир фуқаронинг муқаддас бурчи эканини хулоса қилди.
Изоҳ (0)