Жаҳон соғлиқни сақлаш ташкилоти (ЖССТ) 20 ноябрдан 17 декабргача дунё бўйлаб 850 мингдан ортиқ коронавирусга чалиниш ҳолатини қайд этди. Бу аввалги 28 кунлик даврга нисбатан 52 фоизга кўпдир.
Ташкилот маълумотларига кўра, бу вақт ичида ковид туфайли уч мингдан ортиқ одам вафот этган, бу аввалги даврга нисбатан 8 фоизга кам. Касалланишнинг янги ҳолатлари Россияда кузатилган. Жумладан, 279 359 кишида коронавирус аниқланган, бу аввалги 28 кунлик даврга нисбатан 130 фоизга кўпдир.
ЖССТ Россиядан ташқари, энг кўп касалланиш ҳолатлари Сингапур (120 898 та янги ҳолат; ўсиш 86 фоиз), Италия (114 795 та ҳолат; 10 фоиз ўсиш), Польша (39 828 та ҳолат; 82 фоиз ўсиш) ва Австралияда (39 505 та ҳолат, 12 фоиз ўсиш) кузатилганини маълум қилди.
Умуман олганда, 2023 йил 17 декабрь ҳолатига кўра, дунёда 772 миллиондан ортиқ тасдиқланган коронавирус ҳолатлари қайд этилган ва қарийб етти миллион киши вафот этган.
- Жаҳон соғлиқни сақлаш ташкилоти 2023 йил май ойида COVID-19 тарқалишини халқаро аҳамиятга молик фавқулодда ҳолат деб ҳисоблашни тўхтатганини эълон қилди. Ташкилот 2020 йил январь ойида ковидни фавқулодда ҳолат деб эълон қилиб, март ойида касалликнинг тарқалишини пандемия сифатида тавсифлаганди.
Изоҳ (0)