Европа Иттифоқи давлатлари 4 млрд евролик COVID-вакциналарни ташлаб юборди — Politico

Пандемия даврида Европа Иттифоқи давлатлари томонидан сотиб олинган ва солиқ тўловчиларга 4 миллиард еврога тушган камида 215 миллион доза COVID-19 вакциналари ташлаб юборилди. Бундай хулоса Politico нашрининг ҳисоб-китобларидан келиб чиқади.

Politico ҳисоби Европанинг 19 давлати маълумотларига асосланади – улардан 15 таси нашрга тўғридан тўғри рақамларни тақдим этган, яна тўрттасида ташлаб юборилган вакциналар ҳажми ҳақида маҳаллий ОАВ хабар берган. Энг эски маълумотлар 2022 йил декабрга оид, энг янгиси — 2023 йил декабрга.

Коронавирус пандемияси бошланиб, вакциналар тасдиқланганидан бери Европа Иттифоқи давлатлари биргаликда 1,5 миллиард доза (Европадаги ҳар бир одам учун уч дозадан кўпроқ) препарат олган.

Ўртача, одам бошига энг кўп вакцина дозаси Эстонияда утилизация қилинган. Ташлаб юборилган вакциналар сони бўйича эса Германия етакчи бўлди (83 миллион доза).

Нашр қайд этишича, бир қатор мамлакатлар, жумладан, Франция, Польша, Латвия, Чехия, Венгрия ва Греция ҳукуматлари вакциналарни утилизация қилиш ҳажмини ошкор қилишдан бош тортган.

Бундан ташқари, Германия маълумотларни 2023 йил июнь ойида тақдим этган — ўша пайтда унинг захирасида яна 120 миллион доза бор эди, аммо ўшандан бери ишлаб чиқарувчилар коронавируснинг сўнгги вариантларига мослаштирилган вакциналарнинг янги версияларини тақдим этди, бу эса аввалги вакциналар эскиргани ва ташлаб юборилгани эҳтимолини оширади.

Шундай қилиб, ташлаб юборилган вакциналарнинг ҳақиқий сони анча юқори, деб ёзади Politico.

Нашр ОАВда эълон қилинган нархларга асосланиб, ташлаб юборилган 215 миллион вакцинанинг қийматини 4 миллиард евродан ошиқ деб баҳолади.