АҚШнинг Лас-Вегас шаҳрида жойлашган Wynn меҳмонхонасида Freestyle Chess Grand Slam турнири бўлиб ўтмоқда. Ушбу нуфузли мусобақада ўзбекистонлик икки нафар шахматчи — Нодирбек Абдусатторов ва Жавоҳир Синдаров ҳам қатнашмоқда.
Мусобақасининг илк кунида ҳар икки спортчи ҳам гуруҳ босқичида муносиб иштирок этиб, плей-офф йўлланмасини қўлга киритган эди. 18 июль оқшомида Freestyle Chess Grand Slam турнирининг чорак финал баҳсларига старт берилди. Унда Нодирбек Абдусатторов ҳиндистонлик Аржун Эригайси қарши дона сурди, америкалик Ҳанс Неман эса Жавоҳир Синдоровга рақиблик қилди.
Агар чорак финалдаги ҳар икки партияда ҳам дуранг натижа бўлса, ўйинчилар блиц форматида икки партиядан иборат тай-брек ўтказади. Агар блиц партиялар ҳам тенг натижа билан якунланса, армагеддон ўйини бўлади. Бу ўйинда қора томон учун вақт камроқ, лекин баҳс дуранг билан якунланса, қора томон ғалаба қозонади.
Шу тариқа, биринчи партияда Нодирбек Абдусатторов ҳиндистонлик Аржун Эригайси билан дуранг ўйнади. Шунингдек, Жавоҳир Синдаров ҳамда америкалик Ҳанс Неман ўртасидаги баҳсда ҳам муроса йўли танланди.
Ғолиблар гуруҳи — 1-тур натижалари
Прагнанандҳа Рамешбабу — Фабиано Каруана 1:0
Левон Аронян — Ҳикару Накамура 0:1
Нодирбек Абдусатторов — Аржун Эригайси 0,5:0,5
Ҳанс Неман — Жавоҳир Синдоров 0,5:0,5
Мағлублар гуруҳи
Магнус Карлсен — Видит Гужрати 1:0
Ленер Домингес — Бибисора Ассаубоева 0,5:0,5
Рей Робсон — Винсент Кеймер 0,5:0,5
Сем Севян — Уэсли Со 0:1
Нодирбек Абдусатторов ва Аржун Эригайси ўртасидаги жавоб ўйинида ғалаба ҳиндистонлик шахматчига насиб этди. Энди Абдусатторов мағлублар гуруҳида ғалаба қозонган шахматчига қарши дона суради.
Ҳанс Неман ва Жавоҳир Синдоров ўртасидаги жавоб учрашуви ҳам дуранг билан якунлангач, ғолибни аниқлаш учун тай-брек партиялари ўтказилди. Тай-брекнинг биринчи баҳсида америкалик шахматчи устун келди, иккинчисида эса Синдоров жавоб қайтариб, ҳисобни тенглаштирди.
Ҳал қилувчи армагеддон партиясида Ҳанс Неман зафар қучиб, кейинги босқичга йўл олди.
Энди ўзбекистонлик икки спортчи ҳам мусобақадаги юришини мағлублар йўлагида давом эттиради. Унда Нодирбек Абдусатторовга Винсент Кеймер рақиблик қилса, Жавоҳир Синдоров Уэсли Со билан баҳсларга киришади.
Учрашувлар 18 июлдан 19 июлга ўтар кечаси бўлиб ўтади.
Изоҳ (0)