АҚШ президенти Дональд Трамп мамлакатдан кетадиган ноқонуний муҳожирларга 1000 доллардан ташқари бепул авиачипта берилишини ҳам айтди. Бу ҳақда у ўзининг Truth Social саҳифасида ёзди.
У “ўз-ўзи депортация қилиш” дастури ишга тушганини айтди. Сиёсатчи АҚШни ихтиёрий равишда тарк этишга рози бўлганлар учун ватанига бепул авиачипталар берилишини таъкидлади.
Биз ноқонуний муҳожирларнинг Америкадан чиқиб кетишини максимал даражада соддалаштирмоқдамиз. Бунинг учун аэропортга келиб, уйга бепул чипта олиш кифоя, деб айтган Трамп.
АҚШ президенти ариза топшириш учун махсус мобил илова ишлаб чиқилганини айтди. Бундан ташқари, дастур иштирокчиларига “сафар бонуси” берилади, унинг миқдори ошкор этилмайди. Бироқ АҚШ Ички хавфсизлик вазирлиги тўловлар 1000 доллар атрофида бўлиши мумкинлигини маълум қилганди.
Президент таъкидлашича, бундай чора федерал бюджетга “триллионлаб доллар” тежаш имконини беради. У иштирок этишдан бош тортганлар учун “қаттиқ оқибатлар” — жарималар ва қамоқ жазосидан тортиб, “АҚШ ихтиёрига кўра исталган мамлакатга” тўсатдан депортация қилинишгача бўлган чоралар кўрилиши ҳақида огоҳлантирди.
Биз Американи тарк этишингизни истаймиз. Агар яхши инсон бўлсангиз, келажакда қайтишингизга ёрдам беришимиз мумкин, дея хулоса қилган Трамп.
Изоҳ (0)