Қатар АҚШ президенти Дональд Трампга 400 миллион долларлик “учар сарой” деб номланувчи Boeing 747-8 самолётини совға қилишга тайёрланмоқда. Бу ҳақда ABC News хабар берди.
Маълум қилинишича, самолёт Трампнинг президентлик муддати тугагунига қадар Биринчи рақамли борт сифатида ишлатилади. Президентлик муддатидан кейин самолёт давлат тасарруфидан чиқиб, Трампнинг шахсий коллекциясига ўтади. Бу АҚШ президенти учун тарихдаги энг қимматбаҳо совға бўлиши мумкин.
Совға ҳақида Трамп келаси ҳафта Қатарга борганида эълон қилиниши кутилмоқда. АҚШ президенти февраль ойида ҳашаматли безаклари туфайли “учар сарой” деб ном олган самолётни Вест-Палм-Бич аэропортида турганида кўздан кечирган эди.
Совғанинг қонунийлик масаласи
Нашрнинг ёзишича, Қатарнинг совғаси қонунийлиги борасида саволлар туғдиради. Оқ уй ва Адлия вазирлиги юристлари бу борада мудофаа вазири Пит Хегсет учун ҳуқуқий таҳлил тайёрлаган. Улар Мудофаа вазирлиги совғани қабул қилиши ва кейинроқ уни Трамп фондига топшириш ҳуқуқига эга деган хулосага келган.
Манбалар совға президентнинг ҳеч қандай ҳаракати билан боғлиқ бўлмагани учун пора ҳисобланмаслигини таъкидлаган. Самолёт жисмоний шахсга эмас, балки давлат муассасасига топширилгани сабабли, бу АҚШ Конституциясини бузмайди.
Ҳашаматли самолёт ҳақида нималар маълум?
Экспертларнинг ҳисоб-китобларига кўра, самолётнинг нархи алоқани ҳимоя қилиш учун қўшимча ускуналарни ҳисобга олмаганда тахминан 400 миллион долларни ташкил этади.
У дастлаб АҚШ ҳарбий-ҳаво кучларига топширилади, улар 13 йиллик авиатехникани президент учун хавфсизлик талабларига мувофиқ қайта жиҳозлайди. L3Harris компанияси аллақачон самолётни модернизация қилиш бўйича шартнома олган.
Ҳозирги биринчи рақамли бортлар 1990 йилдан бери ишлатилган эски Boeing 747-200 самолётларидир. 2018 йилда буюртма қилинган янги самолётларни етказиб бериш кечикмоқда. Улар фақат 2029 йилда, Трамп президент бўлмаганида тайёр бўлиши кутилмоқда. Аммо Трамп бу йил янги самолёт сотиб олишни талаб қилмоқда.
Изоҳ (0)