Apple компанияси тарихдаги энг қиммат смартфон — букланадиган iPhone моделини тақдим этишни режалаштирмоқда. Қурилма экранининг маркази одатдаги эгилиш изисиз бўлади. Бу ҳақда Fortune нашри хабар берди.
Таҳлилчилар фикрича, Apple конструкцияни мустаҳкамлаш учун Samsung компаниясининг OLED-дисплейлари ва металл пластиналаридан фойдаланади. Ушбу пластиналар лазерли пармалаш технологияси ёрдамида ўрнатилади. Бундай мураккаб техник ечимлар эса қурилманинг якуний нархига бевосита таъсир қилади.
Йиғиладиган iPhoneʼнинг оммавий ишлаб чиқарилиши 2026 йилнинг иккинчи ярмида бошланиши кутилмоқда. Унинг нархи 2–2,5 минг АҚШ доллари атрофида бўлади.
TF International Securities компанияси таниқли таҳлилчиси Минг-Чи Куонга кўра, янги iPhonʼлар учун Жанубий Кореянинг Fine M-Теc компанияси ишлаб чиқарган металл пластиналар қўлланади. Улар экран деформациясининг олдини олади, чунки юкламани бутун экран юзасига бир текис тақсимлайди.
Бундай пластиналарнинг ҳар бири Appleʼга 30–35 долларга тушиши кутилмоқда. Уларни лазер орқали ўрнатиш жараёни ҳам худди шунча харажат талаб қилади. Бу оддий ўрнатиш усулларига нисбатан 15–20 долларга қимматроқ. Натижада букланадиган iPhone ишлаб чиқаришнинг айнан шу босқичи стандарт моделларга қараганда 175 фоизга қимматга тушади.
Кутилаётган техник хусусиятлар:
Таҳлилчиларнинг тахминига кўра, букланадиган iPhone қуйидаги асосий хусусиятларга эга бўлади:
- 7,8 дюймли ички экран — букилиш изи сезилмайдиган силлиқ юзада;
- 5,5 дюймли ташқи экран;
- иккита асосий камера ва битта олд камера;
- Touch ID сенсорли қувват тугмаси (Face ID бўлмайди).
Apple букланадиган қурилмалар бозорига нисбатан кеч кириб келмоқда, Samsung бундай смартфонларни 2019 йилдан буён ишлаб чиқаради. Бироқ Apple одатдагидек шошилмай, сифат ва барқарорликка устувор аҳамият қаратмоқда.
Изоҳ (0)