“Россия фахрийлари” ҳаракати мамлакатда турк сериалларини намойиш этишни тақиқлашни талаб қилди. Улар мазкур сериаллар демографияга салбий таъсир кўрсатаётганини айтмоқда. Бу ҳақда “Зеркало” хабар берди.
Хабарга кўра, турк сериалларида асосан “нореал эркак образи” гавдалантирилади.
Аёллар, бундай сериалларни томоша қилиб, бизнинг эркакларга қизиқишни йўқотади, улардан хорижий кино маҳсулотлари томонидан шакллантирилган нореал хатти-ҳаракатларни кутишади, деди ҳаракат раҳбари Илдар Резаев.
У турк сериалларининг ортиб бораётган машҳурлиги Россияда туғилишнинг пасайиши ва оила институтининг бузилишига олиб келишини таъкидлади. “Россия фахрийлари” “бузғунчи тарғибот” тушунчасини киритишни ва кинодаги қайси элементлар бу атамага тўғри келишини қонун даражасида белгилашни таклиф қилди. Улар тегишли сўровни Давлат Думаси, Роскомнадзор ва Россия Маданият вазирлигига юборди.
Турк сериаллари — бу онг учун, жумладан, аёлларимиз учун олиб борилаётган мафкуравий урушнинг бир қисми. Туркияда Россия сериаллари намойиш этиладими, у ерга бизнинг кино юлдузларимиз борасими, турк аёллари эса тўда-тўда бўлиб мухлислар сафига тизилишадими, шуни билиш қизиқ бўлар эди. Жуда шубҳали, дея хулоса қилди Резяпов.
Россиялик депутат Виталий Милонов ҳам мамлакатда турк сериалларини намойиш этишни тақиқлаш зарурлиги ҳақида гапирган эди. У турк лойиҳаларини “мутлақо аҳмоқлик” деб атаган ва уларда “ҳақиқий ҳаётга тўғри келмайдиган воқеалар” тасвирланаётганини таъкидлаган.
Изоҳ (0)