Турк актрисаларининг обрўси кундан-кунга ошиб бормоқда. Бироқ уларнинг машҳурликка эришиш йўлини осон деб бўлмайди. Юлдузлар кўпинча мутлақо асоссиз танқидларга дуч келишади. Қуйида Туркия актрисалари кўпинча нималар учун танқид қилиниши ҳақида сўз юритамиз.
Очиқ либослар
Ҳеч кимга сир эмаски, ҳар қандай оммавий тадбирлар учун юлдузларнинг кийимларини стилистлар танлайди, баъзида эса уларнинг образи устида мутахассислар жамоаси ишлайди. Кўпинча турк актрисалари турли маросимларда жуда очиқ либосларда пайдо бўлишади — юлдузлар бу борада кўпроқ танқидга учрайди.
Ҳаддан ташқари калта юбка ёки шорти, ярим очиқ кўйлаклар, ҳажмдор устки қисм ва жуда очиқ пастки қисм — бу рўйхатни чексиз давом эттириш мумкин. Кўпинча ҳейтерларнинг барча эътирозлари фақат битта нарсага асосланади — бу аёллар мусулмон. Бироқ танқидчилар Туркиянинг дунёвий давлат эканлигини негадир бутунлай эътибордан четда қолдиради. Энг кўп танқидга учраган аёллар Мелис Донгел, Серенай Сарикая ва Ҳанде Эрчел. Аммо машҳурларнинг ўзлари бундай танқидларга шунчаки эътибор бермасликка ҳаракат қилишади.
Спиртли ичимликлар ва сигарет
Одамлар азалдан ўз кумирларини идеаллаштириш хусусиятига эга бўлган. Эҳтимол, айнан шу сабабли баъзи турк мухлислари актрисалар мукаммал бўлиши ва ҳеч қандай зарарли одатларга эга бўлмаслиги керак деган фикрга ишонишади.
Кўплаб турк сериали юлдузлари чекади. Туркияда сигарет тутган аёлни эркакдан кўра тез-тез учратиш мумкин ва бу жамият томонидан қораланмайди. Тўғри, сериалларда чекишни иложи борича кўрсатмасликка ҳаракат қилишади. Бироқ ҳамма жойда ҳозир бўладиган папарацсилар кўплаб актрисаларни, жумладан Селма Эргеч, Дениз Чақир, Жансу Дере ва Неслиҳан Атагулни (актриса ҳомиладор бўлишидан олдин) сигарет билан суратга олишган. 2024 йилнинг ёзида Афра Сарачоғли ҳам сигарет билан тушган суратини эълон қилди, аммо бир неча соатдан сўнг мухлисларнинг танқиди туфайли уни ўчириб ташлашга мажбур бўлди.
Бироқ турк актрисалари нафақат чекишади, балки спиртли ичимликларни ҳам истеъмол қилишади. Масалан, Нилпери Шахинкая кўнгилочар жойларда маст ҳолда бўлгани учун бир неча бор жанжаллар марказига тушган. Турк оммавий ахборот воситаларининг таъкидлашича, “Муҳташам юз йил” сериалидаги Шоҳсултон ролини ижро этган Дениз Чақир ҳам бир неча йил аввал спиртли ичимликларни истеъмол қилган. Бундан ташқари, бошқа актрисалар ҳам ижтимоий тармоқларида спиртли ичимликлар солинган қадаҳлар билан тушган суратларини тез-тез жойлаштиришади. Баъзи турк сериаллари мухлислари бундай хатти-ҳаракатларни номақбул деб ҳисоблаб, юлдузларни носоғлом турмуш тарзини тарғиб қилишда айблашмоқда.
Татуировка
Татуировкаси бор турк юлдузлари ҳам кўпинча танқидга учрайди. Баъзилар танадаги бундай расмларини беадаб ва хунук деб ҳисобласа, бошқалар эса актрисалар уларни ўйламай қилдириб, ўзларини хунуклаштирганига ишонишади.
Бироқ машҳур турк сериали юлдузлари бу борада ўз фикрларига эга. Ҳанде Эрчел, Бирже Акалай, Неслиҳан Атагул, Бергузар Корел, Нур Феттаҳоғлу, Нургул Ешилчай — булар татуировкаси бор турк актрисаларининг бир қисмигина, холос. Уларнинг баъзилари татуларини яширса, бошқалари аксинча, уларни кўз-кўз қилишдан уялмайди. Аммо ҳар қандай вазиятда, танқидчилар мусулмон аёллар учун татуировка умуман жоиз эмаслигини таъкидлашади.
Ташқи кўриниш
Ҳаммага маълум оддий бир ҳақиқат — одамлар туғилганда ташқи кўринишларини танлай олмайди. Бироқ бу Туркиянинг баъзи актрисаларини мунтазам равишда ҳақорат қилиш ва камситилишларига халақит бермайди. Кимнидир хунук, кимнидир бесўнақай деб аташади. Энг ёмони шундаки, одатда бундай танқидчилар аноним аватарлар ёки фотошоп қилинган суратлар ортига яширинади.
Кўпинча Серенай Сарикая (“хунук, оғзи ҳаддан ташқари катта”), Ҳанде Эрчел (“ўта озғин”), Фараҳ Зейнеп Абдуллоҳ (“шунчаки даҳшатли, кўримсиз”), Беррак Тузунатач (“эркакшода”) ва Демет Ўздемир каби актрисалар нишонга олинади. Баъзида бундай ҳолатларни кўриб оддий бир ибора ёдга тушади: ҳар кимнинг ўз диди бор ва ташқи кўринишга қараб ҳукм чиқарилмайди.
Пиар ишқий муносабатлар
Бу нафақат турк оламининг, балки умуман шоу-бизнеснинг оғриқли мавзусидир. Аммо айнан Туркияда машҳурларнинг шахсий ҳаёти тобора кўпроқ танқидларга учрамоқда. Сериалдаги бош ролларни ижро этувчилар ўртасида муносабатлар бошланиши ва уларни дарҳол хиёнатда айблаш ҳолатлари тез-тез учрайди. Танқидчилар кўпинча бундай муносабатларни шунчаки пиар деб ҳисоблашади.
Худди шундай ҳолат “Қалбим эшигини қоқ” сериалида Ҳанде Эрчел ва Керем Бурсин билан юз берганди. Кейинчалик Афра Сарачоғлу ва Мерт Рамазон Демир ҳам худди шу тарзда айбланди.
Туркиянинг яна бир зиддияти шундаки, актрисаларнинг мухлислари ҳар қандай севги муносабатини, ҳатто бошқа касб эгаси билан бўлса ҳам, оддий пиар сифатида баҳолашлари мумкин. Эътиборли жиҳати шундаки, кўпинча айнан ҳейт қора пиар сифатида таъсир кўрсатади. Аммо туркиялик юлдузларнинг аксарияти бундай салбий ҳолатларга эътибор қаратишмайди, шунчаки ўз ишларини давом эттиришади.
Изоҳ (0)