Фарғона вилояти Марғилон шаҳридаги автомобилларга газ тўлдириш компрессор шаҳобчасида Matiz газ баллони портлади. Ҳолат юзасидан ФВВ маълумот берди.
Унга кўра, ҳолат бугун, 15 апрель куни соат 12:20 да Марғилон шаҳар “Шолдирама” МФЙ Алишер Навоий кўчасида жойлашган АГТКШда кузатилган. Matiz автомобилига ўрнатилган пропан газ баллони ичига метан гази тўлдириш вақтида газ баллони портлаган.
Портлаш натижасида ёнғин юз бермаган. Ҳодиса натижасида жабрланганлар ва ҳалок бўлганлар йўқ.
2024 йилнинг январь ойи ўрталарида Тошкент вилоятининг Ўрта Чирчиқ туманидаги метан заправкада ҳам “Жигули”да ёнғин чиққанди.
Октябрь ойида Қарши туманидаги автомобилларга суюлтирилган газ қуйиш шохобчасида ёнғин содир бўлганди.
20 февраль куни соат 18:02 да Андижондаги заправкада ҳаво-газ аралашмасининг чақнаши содир бўлган. Фуқароларга малакали тез тиббий ёрдам кўрсатиш мақсадида шифохонага ётқизилган.
Пропан баллонига метан қуймаслик керак. Сабаби:
Метаннинг босими баланд — у жуда кучли сиқилган бўлади. Пропан баллони эса бу қадар босимга чидамайди. Портлаб кетиши мумкин.
Баллон мос эмас. Пропан учун ишлатиладиган баллон ички томондан материали билан метанга тўғри келмайди. Газ сизиб чиқиши ёки носозлик бўлиши мумкин.
Хавфли. Метан ҳам ёнувчан газ. Нотўғри сақланса ёнғин ёки портлаш хавфи бор.
Изоҳ (0)