«Белгиланган миқдордан кўп газ қуйган шохобча лицензиясини бекор қилиш керак». Сенатор Вазирлар Маҳкамасига таклиф берди (видео)

Сенатор Қутбиддин Бурхонов Вазирлар Маҳкамасига таклиф бериб, метан газда юрувчи автомобилларнинг портлашига сабаб бўлувчи асосий омил — газ қуйиш шохобчаларида белгиланган мақдордан кўп газ қуйиш ҳолатига чек қўйиш лозимлигини гапирди. Бу ҳақда Олий Мажлис Сенатининг айни пайтда бўлиб ўтаётган ўттиз иккинчи ялпи мажлисида сўз борди.

Сенати раиси Танзила Норбоева таклифига кўра сўз олган сенатор, Сенатнинг Мудофаа ва хавфсизлик масалалари қўмитаси раиси Қутбиддин Бурхонов метан газда юрувчи автомобилларнинг портлаши билан боғлиқ муаммо бугунги куннинг асосий масалаларидан бири эканини таъкидлади.

Сенатнинг олдинги ялпи мажлисларида бугунги кунда аҳолини қийнаб келаётган энг муаммоли масалалардан бири автомобилларга ўрнатилган газ баллонлари билан боғлиқ муаммо муҳокама қилиниб, Вазирлар Маҳкамасига парламент сўрови сифатида юборилган эди.

Июнь ойида Вазирлар Маҳкамасидан келган жавобга кўра, Сенат қарорида кўрсатилган 1300 дан ортиқ камчиликнинг 815 таси бартараф этилгани, жойлардаги 70 та газ қуйиш шохобчалари фаолияти тўхтатилгани ва керакли ишлар бажарилаётгани маълум бўлган.

Шунга қарамасдан, яқинда Сирдарё вилоятида, Хоразм вилоятидаги МЧЖга қарашли одам ташувчи автобус портлади ва 6 нафар фуқаро воқеа жойида вафот этди. 9 нафар фуқаро эса оғир тан жароҳати олиб, шифохонага ётқизилди.

Биз Сенат қарорида Вазирлар Маҳкамасининг қарори амалда бажарилмаётганини, юк автомобиллар, жумладан, одам ташувчи автобусларга ўрнатилган газ баллонларини техник кўрикдан ўтказиш учун лабораториялар харид қилиниши кераклигини билдиргандик», — дейди сенатор.

Қилинаётган ишларга қўшимча қилиб шуни айтиш керакки, автомобилларнинг газ баллонларини техник кўрикдан ўтказиш учун лаборатория жиҳозлари харид қилиш ва биринчи ўринда автобуслар, микроавтобусларни техник кўрикдан ўтказиш ҳамда газ баллон ўрнатилганига беш йилдан кўп бўлган бўлса, шу баллондан фойдаланиб туришни вақтинча тўхтатиш керак», — деди сенатор.

Яқинда Қашқадарёда Nexia, Жиззахда ‘Жигули’ автомобилидаги газ баллонлари портлади. Бу ҳолат ўрганилганида портлашга газ қуйиш шохобчасида белгиланган миқдордан кўп газ қуйилгани сабаб бўлгани ойдинлашди.

Шу боис газ тўлдириш шохобчаларида белгиланган миқдордан кўп газ қуйиш ҳолати рўй берганда уларнинг лицензиясини маълум муддатга, дейлик олти ой, бир йил муддатга тўхтатиб қўйиш керак деган таклифни берардик.

Вазирлар Маҳкамаси шуни ўрганиб, бунга чора кўрса яхши бўларди», — деди сенатор.