Қорақалпоғистон Республикаси Нукус шаҳрида жойлашган икки қаватли «Neo» ресторани биносида газ ва ҳаво аралашмасидан портлаш содир бўлди, дея хабар бермоқда «Халқ сўзи Online».
Маълумот учун, портлаш 12 июнь куни эрталаб тахминан соат 06:00 да содир бўлган. Воқеа жойига Қорақалпоғистон Фавқулодда вазиятлар бошқармаси Нукус ФВБдан 2 та ёнғиндан қутқариш экипажи етиб келган.
Дастлабки маълумотларга кўра, портлаш бинонинг иккинчи қаватидаги ошхонада содир бўлган. Оқибатда иморат зарарланган.
Мазкур воқеадан тан жароҳати олганлар ва вафот этганлар йўқ. Портлаш содир бўлганида бинода қоровул бўлган, унга жароҳат етмаган.
Воқеа жойига зудлик билан Қорақалпоғистон Республикаси ФВБ, Ички ишлар бўлими, прокуратура ва тез ёрдам хизмати ходимлари етиб келган.
Айни вақтда суриштирув ишлари олиб борилиб, етказилган моддий зарар миқдори аниқланмоқда.
Бундан аввал Фарғонадаги кўп қаватли уйларнинг бирида газ портлагани, Самарқандда метан заправкада турган Nexia’нинг газ баллони портлаб кетгани ҳамда Нурафшон шаҳридаги икки қаватли уйда газ портлаши натижасида бир киши ҳалок бўлгани ҳақида хабар берилганди.
Изоҳ (0)