Жиззах шаҳридаги Мустақиллик кўчасининг «Ойбек» номли хусусий клиника олдидан ўтган қисмида 13 апрель куни тонг соат 7:40 атрофида «Тоза ҳудуд» корхонасига тегишли, Isuzu русумли чиқинди ташувчи юк машинасининг 100 литр ҳажмли метан газ баллони портлаган. Бу ҳақда Бош прокуратура матбуот хизмати «Дарё»га маълум қилди.
Ҳодиса оқибатида пиёдалар ўтиш жойида йўлни кесиб ўтиш мақсадида турган икки киши — 1982 йилда туғилган эркак иккала оёғининг жароҳатлари ташхиси билан ва унинг 2014 йилда туғилган ўғли иккала оёғининг синиши ташхиси билан Республика шошилинч тиббий ёрдам илмий марказининг Жиззах филиали жонлантириш бўлимига ётқизилган. Қайд этишларича, уларга темир парчалар кучли зарб билан келиб теккан.
Шунингдек, портлаб кетган газ баллон парчалари чиқинди ташувчи машина билан бир йўналишда ҳаракатланиб келган Spark ва Cobalt’га, қарама-қарши йўналишдаги Nexia’га зарар етказган.
«Махсус юк автоулов ҳайдовчиси 13 апрель куни соат тахминан 07:15 да Шароф Рашидов тумани ‘Туёқли’ маҳалласи ҳудудида жойлашган ‘Гулида Қудратова’ компаниясининг газ қуйиш шохобчасидан 20 куб метан газ қуйилиши кўзда тутилган газ балонига ортиқча 7 куб сиқилган газни қуйдирганлиги сабабли, катта атмосфера пайдо бўлиши натижасида газ балон портлаганлиги аниқланган», — дейилади Жиззах вилояти прокуратураси ахборотида.
Мазкур ҳолат юзасидан Жиззах шаҳар ИИО ФМБ ҳузуридаги тергов бўлими томонидан терговга қадар текшириш ҳаракатлари олиб борилмоқда.
Мавзуга доир:
- Сирдарёда метан заправкада турган Damas’нинг газ баллони портлаб кетди (фото)
- Тошкентда Nexia’нинг газ баллони портлаши оқибатида унинг атрофидаги 4 та автомобиль шикастланди
- Бухорода Matiz’нинг газ баллони портлаши оқибатида иккита машинага зарар етди
- Андижонда Nexia’га ўрнатилган носоз газ баллони портлади. Уч киши воқеа жойида вафот этди
- Бухородаги автобус ҳалокати юзасидан жиноий иш қўзғатилди
Изоҳ (0)